Minhandlu zabaraniŭ 110 kramam handlavać ałkaholem za daŭhi pierad pastaŭščykami
Kala 110 subjektaŭ haspadarańnia stracili licenzii na razdrobny handal ałkaholnaj pradukcyjaj za nieraźlik z pastaŭščykami. Pra heta paviedamiŭ ministr handlu Valancin Čakanaŭ na kalehii, na jakoj razhladalisia vyniki pracy haliny ŭ studzieni-vieraśni.
«Treba asablivuju ŭvahu nadać raźlikam za pastaŭlenuju pradukcyju. My pavinny damahčysia poŭnaha raźliku. Da kanca hoda zastajecca paŭtara miesiaca, i hetuju prablemu nieabchodna vyrašać. Patrabuju zazirnuć u buchhałtarskija spravazdačnaści, vyśvietlić, chto i kolki pavinien, i zapłacić», — adznačyŭ Valancin Čakanaŭ.
Pavodle jaho słoŭ, ministerstva prymaje miery dla vyrašeńnia hetaj prablemy — kala 110 subjektaŭ haspadarańnia stracili licenzii na razdrobny handal ałkaholnaj pradukcyjaj za nieraźlik z pastaŭščykami. Pry hetym Valancin Čakanaŭ padkreśliŭ, što akramia ałkaholu jość i inšyja hrupy tavaraŭ, pa jakich zapazyčanaść handlu pierad vytvorcami vysokaja.
Taksama ministr źviarnuŭ uvahu na pytańni cenavaha rehulavańnia. «U ciapierašni čas cenavuju situacyju ŭ respublicy možna nazvać adnosna stabilnaj. Nielha raskručvać inflacyju. Viadoma, usie mierapryjemstvy pa źnižeńni koštaŭ, jakija, naprykład, siońnia prachodziać u Minsku i abłasnych centrach, nieabchodna praciahvać», — ličyć Valancin Čakanaŭ. Pavodle jaho słoŭ, praca pavinna być nakiravanaja na źmianšeńnie nahruzki na nasielnictva ŭ suviazi z tym, što ŭpali realnyja hrašovyja dachody.