U Minsku prachodzić ustanoŭčy schod RHA «Chryścijanska-demakratyčny ruch»
Chryścijanskija demakraty 14 listapada ŭ Minsku pravodziać ustanoŭčy schod respublikanskaha hramadskaha abjadnańnia «Chryścijanska-demakratyčny ruch».
Rašeńnie ab stvareńni hramadskaha abjadnańnia było pryniata na źjeździe arhkamiteta pa stvareńni partyi «Biełaruskaja chryścijanskaja demakratyja» ŭ červieni 2015 hoda. Tady adznačałasia, što «chryścijanskaja demakratyja ŭ Biełarusi ŭžo daŭno vyjšła za miežy palityčnaj partyi i stała šyrokim hramadskim rucham, jaki pravodzić u tym liku šmat niepalityčnych hramadskich kampanij».
«Ustanoŭčy schod hramadskaha abjadnańnia płanavaŭsia ŭžo daŭno, — adznačyła staršynia arhkamiteta pa stvareńni abjadnańnia Volha Kavalkova. — Ale my vyrašyli vykarystać dla jaho praviadzieńnia tyja čatyry miesiacy, na jakija Jeŭrasajuz prypyniŭ sankcyi ŭ dačynieńni da biełaruskich uład».
Pavodle jaje słoŭ, stvaranaje abjadnańnie stavić pierad saboj niepalityčnyja mety. «Chryścijanskija demakraty daŭno pravodziać kampanii, jakija nie źjaŭlajucca palityčnymi. Da ich dałučajecca šmat ludziej, jakija nie źjaŭlajucca aktyvistami BCHD. Stvarajučy arhanizacyju, my stavim pierad saboj metu pašyrać kampanii sacyjalnaj skiravanaści: u padtrymku siemjaŭ, biełaruskaj movy, raźvićcia samakiravańnia, pravavoj adukavanaści nasielnictva», — skazała Kavalkova.
Adznačym, što biełaruskija chryścijanskija demakraty šmat razoŭ sprabavali zarehistravać svaju arhanizacyju jak na respublikanskim, tak i na rehijanalnym uzroŭni. Tak, tolki ŭstanoŭčyja źjezdy partyi «Biełaruskaja chryścijanskaja demakratyja» pravodzilisia piać razoŭ. Adnak va ŭsich vypadkach arhanizacyja atrymlivała admovy Ministerstva justycyi ŭ rehistracyi.
