Inflacyja ŭ Biełarusi z pačatku hoda pieravysiła 10%
U kastryčniku spažyvieckija ceny na tavary i pasłuhi ŭ Biełarusi vyraśli ŭ paraŭnańni ź vieraśniem na 0,8%, sa śniežniem 2014 hoda — na 10,1%. Takija źviestki apublikavaŭ siońnia Nacyjanalny statystyčny kamitet.
Ceny na charčovyja tavary za miesiac vyraśli na 1,5%. Bolš za ŭsio padaraželi: aharodnina — na 51,5%, cukar — na 4,8%, alej (akramia aliŭkavaha) — na 4,4%, jajki — na 4,1%, chleb i chlebabułačnyja vyraby — na 2,6%.
Źnizilisia ceny na małako i małočnyja pradukty — na 0,1%, muku pšaničnuju — na 0,1%, syry — na 0,9%, frukty — na 1,4%, bulbu — na 7,1%.
Ceny na niecharčovyja tavary za miesiac vyraśli na 0,8%. Bolš z ŭsio padaraželi: parfumierna-kaśmietyčnyja tavary — na 1,8%, tkaniny — na 1,8%, piśmovyja pryłady — na 1,7%, abutak — na 1,6%. Źnižeńnia cen na niecharčovyja tavary ŭ kastryčniku nie zafiksavana.
Ceny i taryfy na płatnyja pasłuhi na praciahu miesiaca źnizilisia na 0,8%. U pryvatnaści, taryfy ŽKH, pavodle źviestak Biełstata, źnizilisia na 2,1% za košt źnižeńnia taryfaŭ na vodazabieśpiačeńnie (na 10,9%). Pasłuhi pasažyrskaha transpartu pamienšylisia na 3,9%: pasłuhi pavietranaha transpartu stali tańniej na 3,1%, aŭtamabilnych mižharodnich znosinaŭ — na 0,2%, čyhunačnych mižnarodnych znosinaŭ — na 12,2%.
Taksama na 1,5% patańnieli sanatorna-azdaraŭlenčyja pasłuhi, na 0,5% — turystyčnyja.
Padaraželi bytavyja pasłuhi — na 0,6%, pasłuhi suviazi — na 0,1%, vyšejšaj adukacyi — na 0,4%, miedycynskija pasłuhi — na 0,7%. Pasłuhi ŭ śfiery kultury vyraśli ŭ canie na 1,7%: naviedvańnie teatraŭ padaražeła na 2,5%, kinateatraŭ — na 1%, mierapryjemstvaŭ kancertnych arhanizacyj — na 3,5%.
***
Nahadajem, prymajučy 9 listapada z dakładam ministra finansaŭ Uładzimira Amaryna, Alaksandr Łukašenka zapatrabavaŭ skaracić inflacyju da adnaznačnaha pakazčyka. «Biełarusi abjektyŭna nielha mieć vialikuju inflacyju, — zajaviŭ jon. — Lepš niachaj jana budzie adnaznačnaj. Tady ŭžo ludzi zrazumiejuć, što i ŭ nastupnym hodzie ŭ nas inflacyja budzie źnižana. Navat kali ciažka budzie ź biudžetam. Pryjarytet — skaračeńnie inflacyi».
