Aktyvisty pieradali minskim uładam prapanovy hramadzian pa karekciroŭcy hienpłana stalicy
Kampanija «Hienpłan — dla minčan!» pieradała ŭ Minharvykankam, kamitet pa architektury i horadabudaŭnictvie i UP «Minskhrada» prapanovy hramadzian pa karekciroŭcy hienpłana stalicy, paviedamiŭ kaardynatar kampanii Dzianis Kobrusieŭ.
5 listapada zaviaršajecca hramadskaje abmierkavańnie karekciroŭki hienpłana Minska, jakoje startavała 14 kastryčnika. «Siońnia my ŭ miežach kampanii «Hienpłan — dla minčan!» pieradali ŭ struktury Minharvykankama zvarot hramadzian pa pradstaŭlenym prajekcie hienieralnaha płana Minska», — skazaŭ Kobrusieŭ.
Pavodle jaho słoŭ, zvarot składajecca z troch častak. «Kala 50 staronak ujaŭlajuć saboj tekst, u jakim my vykłali niedakładnaści i niestykoŭki, vyjaŭlenyja nami ŭ tłumačalnaj zapiscy da hienpłana. Jany tyčacca i ŭščylnieńnia horada, i aŭtamabilizacyi, i zialonych nasadžeńniaŭ. Toje, što nas nie zadavoliła, my prapanavali ŭbrać i zamianić na toje, što my prapanoŭvajem», — skazaŭ aktyvist.
Druhaja častka zvarotu — heta faktyčna novy raspracavany ekśpiertami rehłamient pa zialonych zonach. «My zrabili bolš jak 50 pravak, jakija nakiravanyja na toje, kab zialonyja zony horada stali bolš abaronienymi ad zabudoŭščykaŭ», — rastłumačyŭ Kobrusieŭ.
Treciaja častka, paviedamiŭ kaardynatar kampanii, heta prapanovy inicyjatyŭnych hrup hramadzian pa raźvićci terytoryj, na jakich jany žyvuć. «Vyłučana bolš jak 10 takich prapanoŭ ad inicyjatyŭnych hrup z vulicy Kirava, ź Sielhaspasiołka, pasiołka Zachodni, rajona Asmałoŭka. Hetyja hramadzianie vielmi zaniepakojenyja płanam ŭład pa ich uščylnieńni, rekanstrukcyi, znosie pryvatnaha siektara», — skazaŭ aktyvist.
Jon paviedamiŭ, što ŭsiaho pad zvarotam padpisałasia bolš jak tysiača čałaviek, kala 700 podpisaŭ pieradadziena siońnia, astatnija padpisnyja listy buduć pieradadzienyja paśla 5 listapada.
Na pytańnie ab mahčymaści praciahu hramadskaha abmierkavańnia Kobrusieŭ adkazaŭ: «Heta było prapanavana inicyjatyŭnaj hrupaj Sielhaspasiołka, była stvorana anłajn-pietycyja. Na maju dumku, praciah abmierkavańnia małavierahodny. Druhoje hramadskaje abmierkavańnie mahčymaje tolki ŭ vypadku, kali hety hienieralny płan pa niejkich pryčynach nie zachoča zaćvierdzić prezident», — miarkuje kaardynatar kampanii.
