Jarmošyna admoviłasia pradastavić «Našaj Nivie» źviestki pra vyniki hałasavańnia pa ŭčastkach
Prezidenckija vybary prajšli, pytańni zastalisia.
Jak adznačała «Naša Niva», naziralniki sutyknulisia z pierapisvańniem pratakołaŭ na mnohich učastkach. Dadzienyja, jakija vyviešvajucca paśla zakančeńnia padlikaŭ, nie supadajuć z tymi, što ahałošvajucca ŭ rajonnaj terytaryjalnaj kamisii.
Byli i inšyja anałahičnyja zdareńni. Naprykład, na ŭčastku №20 Centralnaha rajona «Jeŭraradyjo» dabiłasia adkrytaha padliku biuleteniaŭ. Praces zdymaŭsia na videa. U vyniku za Łukašenku było addadziena 67% hałasoŭ, za Karatkievič — 19%, suprać usich — 11%. Padtrymka Hajdukieviča i Ułachoviča — 1—2%.
Adnak terytaryjalnaja kamisija apuściła vynik Karatkievič da siarednieharadskich 5%, a «suprać usich» uźniała amal da 20%. Astatnija kandydaty taksama palepšyli svaje ličby.
A voś na ŭčastku №23 taho ž Centralnaha rajona vyrasła jaŭka. U pratakole na ŭčastku było paznačana, što prahałasavała 918 čałaviek (kopija pratakoła jość u Redakcyi). Adnak u dadzienych terytaryjalnaj kamisii ličba vyrasła da 1014 čałaviek.
Kab rastavić kropki nad «i», «Naša Niva» źviarnułasia ŭ Centrvybarkam z prośbaj aznajomicca z vynikami ŭsich pratakołaŭ staličnych učastkovych kamisij.
U adkazie za podpisam staršyni Centrvybarkama Lidzii Jarmošynaj paviedamlajecca, što CVK nie maje pratakołaŭ učastkaŭ. Maŭlaŭ, hetyja dakumienty zastalisia ŭ Minskaj haradskoj kamisii. Adnak kamisija spyniła pracu, nivodzin telefonny numar bolš nie adkazvaje.
