Taćciana Karatkievič abskardziła ŭ CVK vyniki vybaraŭ
Eks-kandydat u prezidenty Biełarusi Taćciana Karatkievič 14 kastryčnika padała ŭ Centrvybarkam skarhu z prośbaj pryznać vyniki prezidenckich vybaraŭ niesapraŭdnymi pa ŭsioj krainie.Jak paviedamiła Karatkievič žurnalistam paśla naviedvańnia CVK, skarhu pryniali i płanujuć razhledzieć na pasiadžeńni kamisii 16 kastryčnika.
BiełaPAN
Pavodle słoŭ eks-kandydata, u skarzie ŭtrymlivajucca źviestki naziralnych kampanij «Prava vybaru» i «Pravaabaroncy za svabodnyja vybary», a taksama śpis parušeńniaŭ, zafiksavanych aktyvistami štaba Karatkievič, jaki zaniaŭ 139 staronak.
«My nie spadziajemsia na toje, što pierahledziać vyniki, ale važna być paśladoŭnymi», — padkreśliła Karatkievič.
Na pytańnie, kolki vybarščykaŭ, pavodle jaje acenak, prahałasavali za jaje, Karatkievič adkazała, što kala 25%. «Heta nie taja bolšaść, jakaja dazvoliła b nam pieramahčy», — dadała jana.
Eks-kandydat zaznačyła, što ŭ padadzienaj skarzie taksama ŭtrymlivajucca prapanovy dla CVK pa praviadzieńni nastupnych vybarčych kampanij. U pryvatnaści, prapanoŭvajecca sadziejničać rehistracyi arhanizacyj hramadzianskaj supolnaści, abmiežavać daterminovaje hałasavańnie na vybarach, harantavać uklučeńnie ŭ vybarčyja kamisii pradstaŭnikoŭ usich kandydataŭ i zabiaśpiečyć adkryty padlik hałasoŭ.
Taćciana Karatkievič taksama zajaviła, što jaje kamanda pačynaje padrychtoŭku da nastupnych vybarčych kampanij — parłamienckich vybaraŭ 2016 hoda i prezidenckich 2020-ha.
Zhodna z papiarednimi źviestkami CVK, na vybarach prezidenta Biełarusi, jakija prajšli 11 kastryčnika, za Alaksandra Łukašenku prahałasavali 83,49% vybarščykaŭ, za Taćcianu Karatkievič — 4,42%, za Siarhieja Hajdukieviča — 3,32%, za Mikałaja Ułachoviča — 1,67%. Suprać usich prahałasavali 6,4% vybarščykaŭ. Kančatkovyja źviestki pavinny stać viadomyja 16 kastryčnika.
Zhodna z artykułam 79 Vybarčaha kodeksa vybary prezidenta «ŭ cełym pa respublicy abo pa asobnych učastkach dla hałasavańnia, rajonach, haradach, rajonach u haradach, abłaściach, horadzie Minsku mohuć być pryznanyja niesapraŭdnymi z-za dapuščanych padčas vybaraŭ abo pry padliku hałasoŭ parušeńniaŭ patrabavańniaŭ sapraŭdnaha Kodeksa, kali jany paŭpłyvali na vyniki vybaraŭ u cełym pa respublicy».
Rašeńnie ab pryznańni vybaraŭ niesapraŭdnymi prymajecca Centrvybarkamam. Skarha ab takim parušeńni pavinna być padadziena kandydatam u prezidenty nie paźniej čym na treci dzień paśla vybaraŭ. Rašeńnie CVK ab pryznańni vybaraŭ niesapraŭdnymi moža być abskardžana ŭ Viarchoŭny sud ciaham dziesiaci dzion. Razam z tym rašeńnie ab pryznańni vybaraŭ sapraŭdnymi abskardzić nielha.
