U centry Minska prajšło šmatludnaje šeście za svabodnyja vybary VIDEA, FOTY
Ludzi prajšli ad płoščy Svabody da Jakuba Kołasa. U akcyi ŭziali ŭdzieł da 2000 čałaviek. Heta była pieršaja manifiestacyja z 2010 h.
18.30
Palityki nie zaklikali ludziej prychodzić na Płošču ŭ dzień vybaraŭ.
18.10
Niaklajeŭ zaznačaje, što šeście skončana. «Dziakuj usim, chto pryjšoŭ. Akcyja skončana», — kaža jon.
Častka ŭdzielnikaŭ razychodzicca, častka zastajecca na miesca.
18.09
Niaklajeŭ zaprašaje ŭsich pamalicca za Biełaruś. Usie biarucca za ruki i molacca, čytajuć malitvu «Ojča naš».
18:09
Niaklajeŭ: «My z vami siońnia prajšli nievialikuju častku šlachu niezaležnaści. Nastupnyja hady buduć vyznačalnyja. Dziakuj, što vy jość, my budziem tut haspadarami».
18.07
«My skončyli hety miesiačnik svabody, ale my nie skončyli baraćby, — kaža Statkievič. — My vydzieram hetu ŭładu siłkom».
«U kancy listapada — čornaja data. Dzień, kali ŭ 1996-m Łukašenka zabraŭ u nas uładu. My adznačym hety dzień», — skazaŭ Statkievič
Eks-palitviazień dziakuje tym, chto pryjšoŭ siońnia na šeście.
18:06
«Vybaraŭ niama, ale vybar jość. Nie być skotam», — kaža Labiedźka.
Pačynajecca nievialiki mitynh na płoščy Jakuba Kołasa.
18:02
Mikoła Statkievič admoviŭsia acanić kolkaść udzielnikaŭ šeścia. «Nie važna, kolki pryjšło. Hałoŭnaje, što ludzi nie pabajalisia», — skazaŭ jon. Pobač ź im idzie Anatol Labiedźka.
18.00
Hałava kałony nabližajecca da płoščy Jakuba Kołasa.
17.57
Pierajšli praz tramvajnyja rejki. Iduć dalej.
17.52
Hałava kałony dajšła da vulicy Mašerava. Čakajuć astatnich. Udzielniki šeścia zaciahnuli «Voinaŭ śviatła» «Lapisaŭ».
17.48
82-hadovy mužčyna: «Ja ŭdzielničaju va ŭsich akcyjach z 1988 hoda. Siońnia strach, strach, strach paŭsiul. Kantraktami ludziej pałochajuć, studentaŭ zahaniajuć na vybary. Nam treba svaboda i prahres».
17.44
Hałava kałony spuskajecca ŭ padziemny pierachod na płoščy Pieramohi. Častka pierachodzić pa piešachodnym pierachodzie, parušajučy praviły darožnaha ruchu.
Supracoŭnik DAI spyniaje mašyny. DAI nastojvaje, kab ludzi nie parušali praviłaŭ, a spuskalisia ŭ pierachod.
17.35
Hałava kałony dajšła płoščy Pieramohi. U šeści biare ŭdzieł ad 1500 da 2 000 čałaviek.
Ludzi taksama niasuć raściažki sa słovami Śviatłany Aleksijevič, skazanymi joj padčas anłajna ŭ «Našaj Nivie» 8 kastryčnika: «Ja chaču, kab Biełaruś była padobnaja da skandynaŭskich krain».
17.33
Hałava kałony dajšła da cyrka. Bolš za 1000 čałaviek u kałonie.
17.27
U avanhardzie kałony iduć Mikoła Statkievič i Maryna Adamovič, Uładzimir Niaklajeŭ.
Usio adbyvajecca spakojna i biez pravakacyj. Milicyja prosić nie vychodzić na prajeznuju častku. Prysutnaść milicyi i śpiecsłužbaŭ karektnaja. U adroźnieńnie ad vuličnych akcyj, što adbyvalisia da pieradvybarčaj kampanii, śpiecsłužby nie viaduć naviaźlivaj videafiksacyi ŭdzielnikaŭ.
17.29
Hałava dajšła da Doma prafsajuzaŭ i spuskajecca da vulicy Janki Kupały. Mašyny, što jeduć praśpiektam, pieryjadyčna sihnalać u znak padtrymki.
17.25
Kałona raściahnułasia ad Kastryčnickaj płoščy da HUMa, kolkaść udzielnikaŭ raście.
«Vielmi chočacca pieramien, jak śpiavaŭ Coj, bolš niama čaho dadać, tak usio jasna», — kaža adna žančyna.
Ludzi niasuć banier sa słovami Aleksijevič: «Ja nie barykadny čałaviek, ale mianie ciahnie na barykady, bo soramna za toje, što adbyvajecca ŭ krainie».
Taksama niekatoryja ludzi trymajuć u rukach knihi biełaruskaha nobieleŭskaha łaŭreata. «Treba ž niejak adznačyć prysudžeńnie premii biełaruscy», — kaža adzin z udzielnikaŭ akcyi.
17.21
Hałava vyjšła na praśpiekt Niezaležnaści. Mašyny sihnalać. Z Makdonaldsa naviedniki fatahrafujuć. Padyšli da akna rabotniki restarana.
U kałonie šmat moładzi, jość i piensijaniery.
17.18
Vyjšli na Lenina i iduć da praśpiekta. Skandujuć «Žyvie Biełaruś». Hałava dajšła da Makdonaldsa, chvost jašče na płoščy Svabody.
Adzin z udzielnikaŭ kaža, što pryjšoŭ siudy «kab nie vyhladać tvaŕju». «Vy Lapisaŭ słuchajecie?» — pytaje jon karespandenta. — «Tam usio napisana».
17.15
Šeście rušyła vulicaj, zaraz ludzi iduć da kansiervatoryi, zbočvajuć na Lenina. U kałonie kala 700—1000 čałaviek. Šmat ludziej u cyvilnym, žurnalistaŭ. Mnoha ściahoŭ.
17.13
Ciapier na płoščy kala 500—600 čałaviek.
17:06
«Vola i svaboda nie prychodzić da tych, chto da ich abyjakavy, — kaža Niaklajeŭ. — Biez rašučaści i śmiełaści svabody nie byvaje». Ułada pałochaje nas Ukrainaj, ale heta niapraŭda, Ukraina nie prajhrała, jana svabodnaja.
«Za 20 hadoŭ niezaležnaści my prajšli nie mały šlach. Biełaruś užo nie zrynuć sa šlachu niezaležnaści», — kaža Niaklajeŭ.
Ludzi trymajuć bieł-čyrvona-biełyja ściahi, u šalikach. Trymajuć samarobnyja płakaty, u tym liku i sa słovami Śviatłany Aleksijevič. Pamiž imi prahulvajucca ludzi ŭ cyvilnych kurtkach i šapkach.
17.03
Statkievič vitaje, chto ŭsich pryjšoŭ na schod «Vola naroda».
Heta kampanija ŭžo prajhrana, kaža jon. U biuleteniach niama demakratyčnych kandydataŭ. «My ž pakazvajem, što nie baimsia».
Nazyvaje Łukašenku «Łukoj».
«Siońnia naša apošniaja akcyja. A 24-j hadzinie zakančvajecca pieradvybarčaja kampanija, jakaja baraniła vas ad aryštaŭ. Siońnia my zaviaršajem naš miesiačnik svabody», — kaža Statkievič.
17.01
Statkievič taksama zajaŭlaje, što na vybary iści nie varta. «Vybaru niama, choć ułada i pakłapaciłasia pra svajho kandydata dla kožnaj častki elektaratu».
16.57
Ludzi zadajuć pytańni Statkieviču. Jon kaža, što ŭłady prosta pravodzić akcyi zapałochvańnia: jeździać aŭtazaki, ukidvajecca infarmacyja pra vadamioty.
Statkievič: «Na zaŭtra ničoha nie płanujem. Kandydaty ničoha nie płanujuć. Navošta iści?».
16.55
Pryjšoŭ Mikoła Statkievič. Zaraz na płoščy Svabody kala 200 čałaviek, mnoha žurnalistaŭ.
«Siońnia prachodzić maralnaja akcyja baraćby», — kaža Statkievič.
16:54
Niaklajeŭ zaznačaje, što na vybary iści nie varta. «Pahladzicie, kolki honiać ludziej na daterminovaje, usio vyrašajecca na im»
16.51
Niaklajeŭ krytykuje budučaje rašeńnie ES źniać sankcyi z Łukašenki i jaho atačeńnia.
«Jak heta tak, kaža jon, zabycca na ŭsio toje, što jon usio zrabiŭ za ŭsie heta?»
Na pytańnie, ci płanujucca niejkija akcyi na niadzielu i paniadziełak, Niaklajeŭ kaža: «Akcyi treba płanavać, kali ty niešta možaš prapanavać. Hramadstva zapałochanaje. Nas pałochajuć novym majdanam. Ludzi dumajuć, što ŭ ich hałovy, a nasamreč, u ich na hałovach televizary. Mała naroda chodzić na takija akcyi».
16.46
Pryjšoŭ Uładzimir Niaklajeŭ. Kaža, što płanujecca karotki schod, a zatym šeście. «Vybary ŭžo adbylisia, — kaža jon. — Pytańnie, kolki Łukašenka nabiare hałasoŭ. Našy vysiłki, kab ludzi nie chadzili na vybary, nie dali plonu. Ułady ŭklučyli resurs, kab hnać na vybary».
«Nas čakaje składany čas paśla 11 kastryčnika, samy składany čas za ŭvieś čas isnavańnia», — zaznačyŭ jon.
My nie budziem siońnia kanfliktavać z uładaj, dadaŭ jon.
«Ad samaha pačatku my byli za dyjałoh ź Jeŭropaj», — skazaŭ jon. «My za toje, kab Biełaruś była ŭ Jeŭropie, a nie Łukašenka».
16.43
Na płoščy Svabody pacichu źbirajucca ludzi.
16.39
Pryjšoŭ sustaršynia arhkamiteta pa stvareńni BCHD Pavieł Sieviaryniec. Jon skazaŭ, što vystupaje za svabodnyja vybary i kaža, što jana pa formie budzie prachodzić jak šeście pad nacyjanalnym ściaham i pa źmieście «za svabodnyja vybary». Jon kaža, što płanujecca karotki mitynh, a zatym šeście.
16.34
Pakul na płoščy Svabody niekalki čałaviek, stajać ludzi ŭ cyvilnym. Jość niekalki turystaŭ, fatahrafujecca viasielle.
Aŭtobusy z kursantami milicyi ŭ centry horada
* * *
Praviadzieńnie akcyi było anansavana padčas pikieta suprać stvareńnia rasijskaj avijabazy 4 kastryčnika.
«Pakažam svajo staŭleńnie da ichniaha bałahanu, — zaklikaŭ Statkievič. — Choładna nie budzie, doŭha havaryć pra daŭno zrazumiełaje nie vypadaje. Lepiej projdziem pa horadzie da płoščy Jakuba Kołasa z nacyjanalnymi simvałami», — napisaŭ jon.
Darečy, heta ŭžo čaćviertaja akcyja ŭ Minsku, što ładzić eks-palitviazień Mikałaj Statkievič paśla svajho vyzvaleńnia z turmy 22 žniŭnia.
Jon pravioŭ, razam z Uładzimiram Niaklajevym i Anatolem Labiedźkam, sustrečy z narodam 10 vieraśnia kala HUMa i 23 vieraśnia na płoščy Svabody, a taksama 4 kastryčnika — na płoščy Svabody suprać rasijskaj avijabazy (suarhanizatarami vystupili Alaksiej Maračkin i Viačasłaŭ Siŭčyk). Padčas usich akcyj na arhanizataraŭ byli składzienyja pratakoły supracoŭnikami milicyi, prajšli sudy i pryznačanyja vialikija štrafy.
Arhanizatary dakazvajuć, što jany majuć prava arhanizoŭvać pikiety ŭ ramkach vybarčaj kampanii nie ŭzhadniajučy z uładami.
Ułady patrabujuć uzhadnieńnia, prytym što za apošnija 5 hadoŭ jany ni razu nie dazvalali apazicyi sabracca ŭ centry stalicy.
Za apošniuju akcyju Statkievič, Labiedźka i Niaklajeŭ atrymali štrafy ŭ 9 młn rubloŭ, Siŭčyk — u 10 młn 800 tys.
