U Salihorsku hramadzianie pratestujuć suprać uščylnieńnia FOTA, VIDEA
Staršynia Salihorskaha rajvykankama prapanavaŭ žycharam apłacić vydatki, jakija paniasie ŭłada paśla skasavańnia kantraktu na budaŭnictva kamiercyjnaha žylla. Tydzień tamu kiraŭnik miascovaj viertykali i jaho padnačalenyja naohuł źbiehli z sustrečy z haradžanami. U kanflikcie raźbiraŭsia karespandent «Našaj Nivy».
Salihorsk maje samuju vialikuju ščylnaść nasielnictva ŭ Biełarusi. I nie tolki. U Jeŭropie bolš žycharoŭ na kvadratny kiłamietr tolki ŭ karlikavym Manaka. Na siońnia ŭ šachciorskim horadzie pražyvaje 11 tysiač čałaviek na adzin kvadratny kiłamietr. I hetaja ličba budzie tolki raści.
Užo kolki hadoŭ ułady zabudoŭvajuć isnujučyja rajony, praktyčna nie raźvivajučy novyja. Damy źjaŭlajucca zamiest skvieraŭ, lesaparkavaj zony i navat školnych stadyjonaŭ. Hramadskija aktyvisty jašče ŭ 2011 hodzie sabrali niekalki tysiač podpisaŭ suprać vysiečki lesu, ale ŭ vyniku sami atrymali štrafy za niesankcyjanavanaje pikietavańnie. Na dumku haradskich uładaŭ, inšaha vyjścia ŭ ich niama — z adnaho boku horad maje pramysłovyja terytoryi «Biełaruśkalija», ź inšaha boku heta vadaschovišča i les, a taksama sielskahaspadarčyja ziemli, jakija pavodle zahadu kiraŭnika dziaržavy nielha vykarystoŭvać pad budaŭnictva.
Uładzimir Šyła, inicyjatar kampanii suprać uščylnieńnia, jaki sam pracuje inžynieram, razvažaje inakš.
Na jaho dumku, u dziejańniach uładaŭ prysutničaje karupcyjny faktar — budavać žyllo tańniej i praściej u rajonach, dzie ŭžo jość hatovaja infrastruktura. Šyła źviartaje ŭvahu i na toje, što ŭ samim horadzie ŭłady budujuć pieravažna kamiercyjnaje žyllo.
Na 2016 hod u centry Salihorska zapłanavana budaŭnictva novaha dziesiacipaviarchovaha doma. Kab zbudavać kamiercyjnaje žyllo ŭłady hatovyja źniščyć skvier i vyrubić kala 130 drevaŭ.
Prajekt zaćvierdžany, prajšoŭ usio ekśpiertyzy, ale akazałasia, što hramadskija słuchańni ŭ minułym hodzie byli imitacyjaj — žychary susiednich damoŭ na ich nie byli zaprošanyja. Abviestka była źmieščana na sajcie vykanaŭčaha kamiteta, a voś «kleić abvietski ŭ skviery i dvary nie ličycca abaviazkovaj praktykaj». Navat kali havorka idzie pra dziasiatki drevaŭ, jakija pryjdziecca vysiakać. Tak vykazałasia sp. Kruhłova, jakaja zajmaje pasadu hałoŭnaha architektara. Dy i sam pratakoł słuchańniaŭ na toj momant nie ŭtrymlivaŭ nijakaj detalovaj infarmacyi ab budaŭnictvie, škodzie dla ekałohii i płanavanych infrastrukturnych źmienach. I kali rabočyja pačali kapać jamy dla ŭstaloŭki płotaŭ, žychary aburylisia. Pa-pieršaje, jamy byli zakapanyja ŭnačy, a ŭdzień najbolš inicyjatyŭnyja saliharčanie źbirali podpisy i rychtavali skarhi.
Ułady pahadzilisia na sustreču, jany pavinna była adbycca ŭ minuły čaćvier, 6 žniŭnia. Darečy, infarmacyja ab jaje praviadzieńni źjaviłasia tolki za čatyry hadziny da pačatku, a čas sustrečy, 17:00, abrany nie zusim zručna.
Sam staršynia vykankama pieršapačatkova nie byŭ nastrojeny na dyjałoh. Jon nie davaŭ vykazacca prysutnym, šukaŭ farmalnuju nahodu nie ładzić sustreču — byccam, u zali prysutničajuć nie tyja ludzi, jakija padpisvali zvarot. Tamu zaŭvažyŭšy, što jaho zdymajuć na mabilny telefon, Alaksandr Rymašeŭski pakinuŭ zalu. Za im razhublena paciahnulisia i astatnija čynoŭniki.
Milicyja zapatrabavała ad prysutnych vyzvalić pamiaškańnie vykankamu, na što atrymała admoŭny adkaz. Ludzi chacieli vykazacca, ale rabili heta sami dla siabie. Praz paŭhadziny navat takaja taktyka zajmieła plon – na apošnich šerahach źjaviŭsia namieśnik Rymašeŭskaha, Mikałaj Maskievič. Spačatku jon pradstaviŭsia žycharom horada, ale paźniej prapanavaŭ kampramis — novaja sustreča praz tydzień, u 19:00.
Milicyja sprabavała vyhnać ludziej z vykankama
Praz tydzień u zali sabralisia kala sotni čałaviek. Pryčym, byli ŭsie — i piensijaniery, i šachciory z žonkami, i maci ź niemaŭlatkami, i kaniešnie, milicyja biez formy. Jašče dva milicejskija aŭtamabili na ŭsialaki vypadak čakali ŭ dvary.
Čynoŭnikaŭ nichto nie słuchaŭ. Ludzi pryjšli pačuć tolki adno — ułady pojduć nasustrač žycharam i pieraniasuć budoŭlu ŭ inšy rajon. I nie pačuli.
Zatoje bolš za dziasiatak vystupoŭcaŭ žorstka krytykavaŭ čynoŭnikaŭ za metanakiravanaje ŭščylnieńnie. Z zali pieryjadyčna prosta kryčali. Ciažka skazać, kali miascovym uładam davodziłasia apošni raz sutykacca z takoj abstrukcyjaj z boku hramadzianaŭ.
Pazicyja vykankama palahała na tym, što nijakija normy nie parušany i haradžanie mohuć źviarnucca ŭ sud. Paśla jana trasfarmavałasia ŭ toje, što skasavać rašeńnie mahčyma, ale tady ŭłady vymušanyja buduć kampiensavać škodu pryvatnamu zabudoŭščyku, jakaja moža skłaści 2 młrd. rubloŭ. Alaksandr Rymašeŭski prapanavaŭ žycharam horada … sabrać hrošy i dapamahčy vykankamu z hetym pytańniem.
Paśla staršynia vykankama davoli doŭha pieraličvaŭ ułasnyja dasiahnieńni, ale pramoha adkazu na pytańnie, ci budzie rašeńnie admieniena, prysutnyja nie pačuli — Rymašeŭski ŭskłaŭ adkaznaść na pasiadžeńni vykankama, dzie nie tolki jon maje hołas.
Ale i ci budzie sklikana takoje pasiadžeńnie, žycharam nie paviedamili. Zatoje parekamiendavali źviartacca ŭ sud.
Razzłavanaja žycharka zadaje pytańnie meru
Darečy, takich sudovych pazovaŭ moža być niekalki – užo na nastupny dzień ułady znoŭ sutyknulisia z krytykaj žycharoŭ. U inšym rajonie na miescy školnaha stadyjona zapłanavana budoŭla domu na 98 kvateraŭ.
Ludzi vykazalisia suprać, rašeńnie vykankama krytykavałasia, ale naŭrad na etapie hramadskich słuchańniaŭ kiraŭnictva horada pojdzie nasustrač.
