Vusieni abjeli ŭsiu raślinnaść u vioscy pad Maładziečnam, sproby sabrać ich skančajucca alerhijaj VIDEA
Pražerlivyja šaŭkaprady źniščyli ŭsio na svaim šlachu: sady i stohadovyja duby.
Vusieni niaparnaha šaŭkaprada pakidajuć za saboj pustyniu. Stohadovy dub pieražyŭ dźvie suśvietnyja vajny, ale akazaŭsia biezdapamožnym pierad paŭzučym škodnikam.
Da hetaha hoda ničoha padobnaha miascovyja žychary nie bačyli. Biada pryjšła viasnoj. Vusieni atakavali viosku raptoŭna. Maładoje liście źnikała litaralna na vačach.
Ź nievialikimi sadovymi drevami pražerlivyja istoty raspraŭlajucca za paru dzion, duby i lipy zdajucca za tydzień. Źniščyŭšy listotu na ślivach, ihrušach, vusieni pierachodziać na parečku, malinu, kłubnicy. Miascovyja žychary dniami trymajuć abaronu.
Pad strechami chataŭ možna bačyć tysiačy pieraplecienych pavucińniem kokanaŭ.
Sproby sabrać škodnikaŭ skančajucca žudasnaj alerhijaj. Palčatki nie dapamahajuć. Drobnyja vałasinki ličynak raznosić viecier, i jany razdražniajuć skuru. Pa ŭsim ciele vyskokvajuć puchiry, jany mocna śviarbiać.
Žychary Kaniuchoŭ nazirajuć žachlivyja karciny: dziasiatki tysiač vusieniaŭ sucelnym dyvanom pierasoŭvajucca ad dreva da dreva.
Niaparny šaŭkaprad — heta nie pryšły monstar, a zvykły dla Biełarusi vid. Nie treba jaho błytać z tutavym šaŭkapradam, jaki razvodziać dla vyrabu šoŭku. Ale kali raniej niaparny šaŭkaprad sustrakaŭsia najbolš na poŭdni i łakalna, to ciapier mihravaŭ i staŭ imkliva razmnažacca. Pryčyna hetaha sioleta — ciopłyja, suchija zima i viasna hetaha hoda. Spynić raspaŭsiud jaho moža daždžystaje nadvorje, jakoje zaminaje paravańniu matylkoŭ šaŭkapradaŭ i pryvodzić da adkładańnia nieapłodnienych jajek.
Navukoŭcy zafiksavali, što, kali ŭ navakolli niama ŭlubionych duboŭ, lipaŭ, ślivaŭ, šaŭkaprady hryzuć navat maładyja dreŭcy chvajovych parod. Sapraŭdnaja źježa!
Kab situacyja nie vyjšła z-pad kantrolu, śpiecyjalisty nastojvajuć na papieradžalnych udarach.
«Papulacyi treba prybrać albo chimičnym sposabam, albo miechaničnym», — kaža Aleh Baradzin, hienieralny dyrektar navukova-praktyčnaha centra Nacyjanalnaj akademii navuk Biełarusi pa bijaresursach.
