Harady-spadarožniki Minska: Smalavičy — kvartał u čystym poli FOTAREPARTAŽ
Horad-spadarožnik Minska — Smalavičy.
U sakaviku 2015 hoda Kamitet architektury i horadabudaŭnictva Minharvykankama zaćvierdziŭ kancepcyju raźvićcia haradoŭ-spadarožnikaŭ Minska. Zhodna ź joj, a taksama z pažadańniami Alaksandra Łukašenki ab spynieńni intensiŭnaj zabudovy biełaruskaj stalicy, da 2030 hoda bolš za 120 tysiač žycharoŭ Minska musiać zasialić 6 haradoŭ-spadarožnikaŭ. Dla pierśpiektyŭnaha raźvićcia abranyja Smalavičy, Łahojsk, Fanipal, Dziaržynsk, Rudziensk i Zasłaŭje.
Centralnaja płošča Smalavičaŭ — Niezaležnaści.
Typovy krajavid žyłoj zabudovy ŭ Smalavičach.
Smalavičy ŭ prahramu haradoŭ-spadarožnikaŭ uniesienyja ŭ 2010 hodzie. Pierśpiektyŭnaje raźvićcio hetaha rajcentra płanujecca sumiesna z Kitajska-biełaruskim industryjalnym parkam. Raspracoŭka hienpłana parka prajšła pad znakam pratestaŭ žycharoŭ rajona, u jakich pad park musili zabrać ziamielnyja nadzieły. Ale ad samich Smalavičaŭ kitajska-biełaruski prajekt raźmieščany za dziasiatak kiłamietraŭ i nijak nie ŭpłyvaje na stałuju zabudovu rajcentra.
Pobač z horadam — vadaschovišča.
Biez mašyny — nijak
Transpartnaje raźmiaščeńnie Smalavičaŭ maje svaje vyhody — z dvuch bakoŭ horad atačajuć dźvie respublikanskija šašy, pamiž jakimi prachodzić jašče i čyhunka. U pryncypie, raźvićcio Smalavičaŭ jak horada i pačałosia paśla zakładki čyhunačnych vuzłoŭ.
Dajezd da Minska čyhunkaj zajmaje kala hadziny — dla pryharada Minska heta nie tak i mała. Maršrutki ŭ Minsk dajazdžajuć za paŭhadziny. Aŭtobusnych maršrutaŭ u Smalavičach usiaho čatyry, a intervał ruchu — kala hadziny. Tamu žyćcio biez mašyny tut niaprostaje.
Staraja draŭlanaja zabudova ŭ Smalavičach.
Kab dabiracca piechatoj da škoły, sadka ci balnicy miascovym žycharam treba niamała času — ad paŭhadziny da hadziny. Sučasny čyhunačny vakzał mieścicca na ŭskrajku horada, a druhaja stancyja i asnoŭnaja dla Smalavičaŭ, Zarečnaje, bolš nahadvaje prypynačny punkt dla dačnikaŭ.
Staryja Smalavičy
Čyhunka ŭmoŭna dzielić Smalavičy na paŭnočnuju i paŭdniovuju častki. U paŭnočnaj častcy — administracyjny centr, šmatpaviarchovaja i pryvatnaja zabudova, u paŭdniovaj — pieravažna pryvatnaja zabudova i pramysłovaja zona. Na płoščy Niezaležnaści raźmieščany rajvykankam z pomnikam Leninu.
U dvary draŭlanaj chaty.
Krama i kaścioł na ŭzhorku.
Staraja zabudova Smalavičaŭ — typovy rajcentr z šyrokaj, pieravažna draŭlanaj, pryvatnaj zabudovaj, pamiž jakoj raźmieščany asnoŭnyja budynki infrastruktury. Niahledziačy na heta, jakaść daroh tut nie vyklikaje pytańniaŭ. Haradskaja infrastruktura nie vielmi raźvitaja i raskinutaja pamiž pryvatnymi siektarami.
Šmat u kaho na pryvatnych padvorkach mieściacca hrady i sady.
Z turystyčnych cikavostak u Smalavičach častkova pryciahlnaja draŭlanaja zabudova, pomnik Śviatomu Valancinu la adnajmiennaha kaścioła i turystyčny patencyjał dvuch vadaschoviščaŭ pobač z horadam.
Kvartał dla mienčukoŭ i novyja Smalavičy
Kvartał pad zabudovu damoŭ dla mienčukoŭ vydzieleny na ŭskrajku Smalavičaŭ, pobač z malaŭničym vadaschoviščam i trasaj R53, jakaja viadzie ŭ Minsk.
Ad centra horada da «minskaha kvartała» iduć dźvie paralelnyja vulicy — Sacyjalistyčnaja i Kamsamolskaja. Budaŭnictva kvartała pačałosia ŭ čystym poli. Na dadzieny momant całkam zdadzieny adzin jašče nie zasieleny dom, a druhi tolki ŭzvodzicca. Na budaŭničaj placoŭcy — tolki adzin kran. Pobač z budaŭnictvam mieściacca novyja spalnyja rajony i «elitny» dla Smalavičaŭ pryvatny siektar.
Asnoŭnaja prablema dla hetaha rajona novych Smalavičaŭ i «kvartała dla mienčukoŭ» — adsutnaść kamunikacyj i infrastruktury. Da najbližejšaj škoły adsiul — 40 chvilin piechatoj, da palikliniki — paŭhadziny.
Z usich vyhodaŭ — tolki niadaŭna pabudavany dziciačy sadok i praduktovaja krama.
Košty na kvatery ŭ novym domie: dvuchpakajoŭka (58 kv. m.) — 32,5 tys. dalaraŭ, trochpakajoŭka (81 kv. m.) — 45,7 tysiačy.
Zabudova «kvartała dla mienčukoŭ» tolki pačynajecca.
Čyhunka paralizuje ruch
Vialikaj prablemaj dla Smalavičaŭ źjaŭlajecca, jak ni dziŭna, čyhunka. Horad maje tolki adzin pierajezd, a čyhunačnaja mahistral dzielić horad na dźvie častki. Na čas prachodu ciahnikoŭ aŭtamabilny i transpartny ruch z adnoj u druhuju častku horada paralizujecca na dziesiać-piatnaccać chvilin.
Zdarajecca, što pažarnyja ci chutkaja dapamoha spaźniajucca pa vyklikach — balnica i pažarnaja častka mieściacca ŭ roznych kancach horada. Hramadskaść Smalavičaŭ užo dziasiatak hod damahajecca budaŭnictva mosta nad čyhunkaj, kab vyrašyć hetuju prablemu.
Miascovyja žychary na pytańnie pra raźvićcio Smalavičaŭ jak horada-spadarožnika reahujuć pa-roznamu. Niechta bačyć u hetym niehatyŭ — niavyrašanyja transpartnyja i infrastrukturnyja prablemy z pavieličeńniem kolkaści žycharoŭ tolki ŭskładniacca.
A niechta radujecca tamu, što horad budzie raści i pastupova źmianiacca ŭ lepšy bok, bo z rostam nasielnictva źjaviacca novyja pracoŭnyja miescy, a infrastruktura horada pry hetym budzie tolki raźvivacca.
Kali padsumoŭvać kancepcyju raźvićcia Smalavičaŭ jak horada-spadarožnika, to varta adznačyć, što heta maje vialiki patencyjał da raźvićcia sumiežnych ź Minskam haradskich prastoraŭ.
Bolš za 20% nasielnictva Biełarusi pražyvaje ŭ Minsku, i taki pakazčyk charakterny dla słabaraźvitych ekanomik. U toj ža čas sumiežnyja sa stalicaj rehijony adčuvajuć vialiki niedachop inviestycyj dla raźvićcia svajoj infrastruktury i miascovaj ekanomiki.
Uvohule, raźvićcio haradoŭ-spadarožnikaŭ, jakija ŭtvarajuć ź mietrapolijaj (u našym vypadku heta Minsk) ahłamieracyju, — tendencyja dla raźvitych kapitalistyčnych ekanomik. Kali zamožny siaredni kłas pastupova pierajazdžaje ź pieranasyčanaj stalicy ŭ pryharady.
Ale ci pažadajuć mienčuki pierabiracca na stałaje miescažycharstva choć i ŭ novyja mikrarajony, ale ŭ nie raźvity horad-rajcentr sa słaboj infrastrukturaj i transpartnymi prablemami — vialikaje pytańnie i vyklik dla raspracoŭščykaŭ kancepcyi haradoŭ-spadarožnikaŭ.
Krajavidy Smalavickaha kraju.
Na bierazie vadaschovišča.