Kiraŭnik MUS nazvaŭ žurnalistam abjekty, jakija «nikomu nie rekamiendavaŭ by fatahrafavać»
Ministr unutranych spraŭ Biełarusi Ihar Šunievič 2 krasavika ŭ razmovie z žurnalistami pieraličyŭ abjekty, jakija «nikomu nie rekamiendavaŭ by fatahrafavać».
michaelhyatt.com
«Pieralik stratehičnych abjektaŭ viadomy. Ale, aprača ŭsiaho, ja b nie rekamiendavaŭ fatahrafavać nikomu padraździaleńni, budynki, pabudovy, techničnyja srodki, srodki ŭzbrajeńnia i asabovy skład orhanaŭ unutranych spraŭ i ŭnutranych vojskaŭ, vajskoŭcaŭ Respubliki Biełaruś i inšych pravaachoŭnych viedamstvaŭ (u tym liku heta adnosicca da budynkaŭ), a taksama sudy. Ja b na hetym abmiežavaŭ», — skazaŭ kiraŭnik MUS, kamientujučy niadaŭnija incydenty z zatrymańniem žurnalistaŭ, jakija fatahrafavali administracyjnyja budynki.
Nahadajem, niekalki takich incydentaŭ zdaryłasia ŭ Minsku i inšych haradach krainy ŭ kancy lutaha—pačatku sakavika. Na patrabavańnie Biełaruskaj asacyjacyi žurnalistaŭ rastłumačyć pryčyny dla zabarony na fotazdymku administracyjnych budynkaŭ u MUS zajavili, što takoj zabarony niama, ale jość unutranaje ŭkazańnie ministerstva, jakoje dazvalaje supracoŭnikam milicyi, jakija niasuć słužbu pa achovie budynkaŭ, pacikavicca metami zdymki. Dać heta ŭnutranaje ŭkazańnie dla aznajamleńnia ŚMI ŭ MUS admovilisia, spasłaŭšysia na ŭnutryviedamasny charaktar dakumienta.
Jak zajaviŭ siońnia Šunievič, u MUS razumiejuć, što administracyjnyja budynki «mohuć być cikavyja jak abjekty sistemy biaśpieki i jak mahčymyja abjekty pravakacyjnych dziejańniaŭ u tym liku». «Takoje staŭleńnie da hetaha pracesu było pradyktavana nie tolki našymi apasieńniami tym, što adbyvajecca ŭ Jeŭropie (terarystyčnyja akty i peŭnyja pahrozy ekstremizmu), ale i svaim ułasnym dośviedam. My niekalki vypadkaŭ zafiksavali, kali adkryta chulihanskija, zadzirlivyja zdymki raźmiaščalisia ŭ internecie i inšym čynam vykarystoŭvalisia dla taho, kab dyskredytavać uładu, kab vyklikać niehatyŭnyja emocyi ŭ vielmi vialikaj kolkaści hramadzian».
Pavodle jaho słoŭ, sa zhadanaha ŭnutryviedamasnaha dakumienta vynikaje, što akredytavanyja žurnalisty mohuć fatahrafavać, ale pavinny mieć pry sabie redakcyjnaje paśviedčańnie: «Kali vy znachodziciesia na pracy, pavinny mieć adpaviednaje paśviedčańnie. Kali nie znachodziciesia na pracy i fatahrafujecie jak zvyčajny hramadzianin, to čytaj pieršy punkt».
Na piarečańnie žurnalistaŭ, što niemahčyma kiravacca praviłami dakumienta, ź jakim nikomu nie dajuć aznajomicca, Šunievič adkazaŭ: «Hramadzianam i nie treba im kiravacca — heta dakumient dla supracoŭnikaŭ orhanaŭ unutranych spraŭ dla ŭzmacnieńnia ich pilnaści i nie bolš za toje».
«Zabarony na fatahrafavańnie niama, — padkreśliŭ ministr. — U nas u zakanadaŭstvie, u adroźnieńnie ad inšych krain, vielmi mała zabaronaŭ na fatahrafavańnie tych ci inšych abjektaŭ. Vy viedajecie, što ŭ praktycy kala 60 dziaržaŭ isnujuć takija zabarony. U niekatorych krainach zabaroniena fatahrafavać dzicia biez dazvołu baćkoŭ, možaš zahrymieć u palicejski ŭčastak tolki tamu, što nakiravaŭ svoj fotaaparat na palicejskaha».
Šunievič paabiacaŭ žurnalistam padumać nad prapanovaj akreślić budynki, jakija nielha fatahrafavać, śpiecyjalnymi znakami.
Nakont dziejańniaŭ supracoŭnikaŭ milicyi kiraŭnik MUS zajaviŭ nastupnaje: «Kali supracoŭnik, jaki budzie zatrymlivać vas, budzie mieć abhruntavanyja padazreńni ŭ tym, što vašy pavodziny vyklikajuć u jaho hetyja padazreńni, to jon upeŭnieny (choć by ŭnutranaje pierakanańnie majecca ŭ tym, što niejkaja pahroza isnuje), jon abaviazany pravieryć vas, što i dla čaho vy fatahrafujecie, vyśvietlić i, razabraŭšysia, adpuścić, kali hetaja pahroza nie paćvierdzicca».
Pry hetym, kali padazreńni supracoŭnika milicyi nie paćvierdziacca, kampiensavać zatrymanamu hramadzianinu, naprykład, košt bileta na ciahnik, na jaki jon spaźniŭsia, nichto nie budzie, dadaŭ Šunievič. «Heta ahulnasuśvietnaja praktyka, i my jaje budziem vykonvać dla taho, kab abaranić vas, pavažanyja, siabie abaranić ad mahčymych pahroz, jakija ŭ śviecie siońnia vielmi šyroka raźvity. Viedajcie, što vy ryzykujecie. Pieralik stratehičnych abjektaŭ viadomy», — zajaviŭ ministr.
