Biełaruski dypłamat u ZŠA: Na konie naša niezaležnaść, praciahnicie ruku dapamohi Biełarusi VIDEA
Časovy pavierany ŭ spravach Biełarusi ŭ ZŠA Pavieł Šydłoŭski zrabiŭ šerah hučnych zajaŭ, vystupajučy na kanfierencyi Atłantyčnaj rady, pryśviečanaj prablemam Uschodniaha partniorstva 30 studzienia. U pryvatnaści, kiraŭnik biełaruskaj ambasady pryznaŭ prablemy z demakratyjaj u Biełarusi, adnak paprasiŭ «praciahnuć ruku dapamohi», bo niezaležnaść krainy znachodzicca pad pahrozaj.
Pavieł Šydłoŭski.
Siarod vystupoŭcaŭ na kanfierencyi byli były jeŭrakamisar pa pytańniach palityki susiedstva Štefan Fiule, byłaja kiraŭnica MZS Ispanii Anna Pałasijo, staršynia kamiteta pa mižnarodnych spravach Jeŭraparłamienta Ełmar Brok i kiraŭnik kamiteta pa pravach čałavieka Viarchoŭnaj rady Ukrainy Ryhor Niamyra.
Časovy pavierany Biełarusi Pavieł Šydłoŭski znachodziŭsia ŭ hladzielnaj zale i paśla vystupleńniaŭ udzielnikaŭ dyskusii ŭziaŭ mikrafon, pradstaviŭsia i padziakavaŭ arhanizataram za zaprašeńnie, a taksama za «haračy abmien dumkami» (1:06:00 na videa). Samoha Šydłoŭskaha na zapisu nie vidać, tolki čutny jaho hołas. Adnak adzin z prysutnych na kanfierencyi, były supracoŭnik biełaruskaha MZS Valeryj Kavaleŭski paćvierdziŭ, što vystupaŭ mienavita kiraŭnik biełaruskaj ambasady.
«Znoŭ usio krytykujuć Biełaruś za prablemy z pravami čałavieka. Tak, u nas jość prablemy z pravami čałavieka, prablemy z demakratyjaj. Usio nie tak idealna, jak mahło b być. My robim usio, što možam, kab palepšyć situacyju z pravami čałavieka. Ale ŭ siońniašniaj situacyi važna, što na konie sam naš suvierenitet, naša niezaležnaść», — zajaviŭ Šydłoŭski.
U takoj situacyi, praciahnuŭ jon, Biełaruś nieabchodna dałučać u supracoŭnictva i ź ES, i z Rasijaj. «Tamu ja prapanuju ŭsim vystupoŭcam pryznać asablivaje miesca Biełarusi, jaje asablivuju rolu ŭ hety momant i praciahnuć joj ruku dapamohi ŭ toj ekanamičnaj situacyi, u jakoj jana apynułasia ŭ suviazi z ekanamičnymi prablemami ŭ Rasii», — skazaŭ biełaruski dypłamat.
Jon zajaviŭ, što Biełaruś šanuje pavahu jaje suvierenitetu, i znoŭ zaklikaŭ pačać supracoŭničać ź Biełaruśsiu.
Praź niejki čas adzin z udzielnikaŭ kanfierencyi, ukrainski deputat Ryhor Niamyra spytaŭ u biełaruskaha dypłamata, chto mienavita pahražaje biełaruskaj niezaležnaści. Pakul Šydłoŭskamu pieradavali mikrafon, uźnikła paŭza i chtości skazaŭ: «Litva». Heta vyklikała śmiech u zale.
Biełaruski dypłamat, u svaju čarhu, adkazaŭ (1:11:15) na videa), naša kraina apynułasia pamiž mołatam i kavadłam. Vajna, jak skazaŭ Alaksandr Łukašenka, idzie kala samych našych miežaŭ, a na zachad ad Biełarusi pačałasia honka ŭzbrajeńniaŭ. Tamu, paŭtaryŭ Šydłoŭski, Biełaruś adčuvaje pahrozu svajmu suvierenitetu i niezaležnaści.
Jaho pierapytali, što mienavita stała pryčynaj takoj zaniepakojenaści: niestabilnaść abo kankretnaja kraina. Na heta biełaruski dypłamat adkazaŭ: «Niestabilnaść, nie kankretnaja kraina. Ja nie budu nazyvać kankretnyja krainy. Niestabilnaść, niepradkazalnaść, honka ŭzbrajeńniaŭ na zachad ad nas. My pavinny razumieć, što adbyvajecca, što heta nie nakiravana suprać nas, što naša kraina nie stanie raźmiennaj kartaj u hetaj hieapalityčnaj hulni, i što my nie stracim niezaležnaść «.
Mienavita tamu, padkreśliŭ Šydłoŭski, Biełaruś ŭniesła źmieny ŭ zakon ab vajennym stanoviščy, jakija pavinny ŭstupić u siłu 1 lutaha. «Hety zakon vyznačaje asablivyja padstavy dla abviaščeńnia vajennaha stanovišča ŭ krainie», — dadaŭ kiraŭnik biełaruskaj ambasady.
