Ministr zdaroŭja zapiarečyŭ Łukašenku: Hramadzianie nie pavinny chadzić u apteku jak u kramu
Hramadzianie nie pavinny chadzić u apteku jak u kramu, zajaviŭ u efiry prahramy «Tydzień» telekanała STB uviečary 14 śniežnia ministr achovy zdaroŭja Biełarusi Vasil Žarko, kamientujučy pretenzii hramadstva da novaŭviadzieńniaŭ viedamstva.
«My ŭviali tolki adna navinku — zachoŭvańnie receptu ŭ aptecy na praciahu adnaho miesiaca. My abmiežavali samalačeńnie, bo ŭbačyli: hramadzianie ŭ apteku pačali chadzić jak u kramu. Doma ŭ kožnaha — cełyja aptečnyja kijoski.
Lačyć pavinien ni pravizar u aptecy, ni susied, ni svajak, ni internet, lačyć pavinien doktar — heta jaho pramy abaviazak», — zajaviŭ ministr.
Pavodle jaho słoŭ, atrymlivajecca, što doktar nie moža prakantralavać i pryznačyć lačeńnie, moža treba ŭnieści karektyvy.
Žarko adznačyŭ, što ŭ minułym hodzie rynak lekavych srodkaŭ u Biełarusi pavialičyŭsia na 170 młn. «U nas što, nastolki bolš stała hramadzian? Zachvorvańniaŭ stała bolej? Niama ni adnaho, ni druhoha», — kanstatavaŭ ministr achovy zdaroŭja.
Adkazvajučy na pytańnie, što rabić chraničnamu pacyjentu, jaki prymaje adzin i toj ža preparat 20-30 hadoŭ, naprykład, ad vysokaha cisku, kiraŭnik Ministerstva achovy zdaroŭja rastłumačyŭ: «U nas dva hady praktyka dla asob, jakija majuć lhoty pa vodpusku lekavych srodkaŭ, dazvalaje vypisvać recepty da paŭhoda, u zaležnaści ad dyjahnazu. I toje ž samaje dla chraničnych chvorych. Doktar maje prava vypisać šeść receptaŭ», — raskazaŭ ministr.
Na jaho dumku, navat biezrecepturnyja leki pavinien pryznačać doktar.
Ministr taksama paviedamiŭ, što i dziaržaŭnyja, i pryvatnyja apteki aryjentavany na vydaču ŭ krajnich vypadkach, u vyhladzie vyklučeńnia recepturnych srodkaŭ biez receptaŭ ź fiksacyjaj dadzienych čałavieka, jaki nabyŭ preparat. «Hałoŭnaje, kab heta nie było sistemaj», — adznačyŭ jon.
Prosta padčas intervju Žarko biez usialakaha abśledavańnia vypisaŭ pa prośbie karespandenta STV jamu recept na preparat ad vysokaha cisku. Recept ministr pisaŭ paŭtary chviliny.
Kiraŭnik Ministerstva achovy zdaroŭja zajaviŭ, što pierakanaŭ Łukašenku ŭ tym, što rašeńnie, pryniataje ministerstvam, było pravilnym.
Nahadajem, što prymajučy Žarko 9 śniežnia, Łukašenka zajaviŭ, što Ministerstva achovy zdaroŭja nie pavinna bajacca pryznać, kali z pryniaćciem rašeńnia ab novym paradku vodpusku lekavych srodkaŭ u aptekach była zroblenaja pamyłka.
«I kali vy ažyćciaŭlajecie niejkija dziejańni, vy ž spačatku ludziam raskažycie. I adnačasova! A nie potym, kali ŭsie ludzi ŭ čerhi stali i šturmujuć apteki i palikliniki».
«Hetaja vaša viadomaja pastanova, jakaja, jak mnie zdałosia, vyklikała buru emocyj u našym hramadstvie. Ludzi pačali skardzicca, što ministerstva zajmajecca nie tym, čym treba, Ministerstvu achovy zdaroŭja treba zaniacca ŭmovami lačeńnia i hetak dalej i hetamu padobnaje, a nie ŭstanaŭleńniem niejkich biurakratyčnych pieraškod», — skazaŭ biełaruski kiraŭnik.
Alaksandr Łukašenka adznačyŭ, što paprasiŭ jak asobnych uračoŭ raskazać pra situacyju, tak i daručyŭ Infarmacyjna-analityčnamu centru pry Administracyi prezidenta pravieści daśledavańnie ŭ hramadstvie.
«Ludzi nastrojenyja vielmi niehatyŭna! I nielha supraćpastavić ich mierkavańniu ničoha! — padkreśliŭ jon.
— Dapuścim, navošta heta było ŭvodzić napiaredadni roznaha kštałtu virusaŭ, epidemij, vostraha pieryjadu zachvorvańnia? Nahruzka na ŭračoŭ pavialičyłasia pry vypiscy. I šmat inšych pytańniaŭ i prablem».
«Vy mnie havorycie ab tym, što chtości tam łabiruje hetyja pracesy, kamuści nie padabajecca, u srodkach masavaj infarmacyi ŭzdymajuć pytańni, a na samaj spravie pryniata pravilnaje rašeńnie. Ja nie vyklučaju, što kamuści heta nie padabajecca. I heta ŭ nas zaŭsiody byvaje», — zajaviŭ Łukašenka.
Na jaho dumku, biźniesmieny, ułaśniki aptek i hetak dalej «ukidvajuć u srodki masavaj infarmacyi svaje niezadavalnieńni». «Tak, na heta treba reahavać, treba, kab valuta ŭ krainie zastavałasia i inšaje. Ale treba rabić heta razumna, kab nie stvarać prablem ludziam», — adznačyŭ 9 śniežnia aficyjny lidar.
