Alisa Frejndlich siońnia adznačaje jubilej
8 śniežnia adznačaje svoj jubilej — vydatny, cudoŭny jubilej! — błakadnaja dziaŭčynka Alisa. Alisa Brunaŭna Frejndlich. Dačka vydatnaha akciora Bruna Frejndlicha, sama jakaja stała hienijalnaj aktrysaj.
Naradzisia jana ŭ Francyi, jana stała b Saraj Biernar i syhrała b Hamleta. U Savieckim Sajuzie joj dazvolili syhrać frahmienty z «Uryela Akosty». Zdajecca, heta adzinaja jaje mužčynskaja rola.
Ale bolš i nie treba. Jana — cudoŭnaja, čaroŭnaja žančyna, nie bajałasia być niepryhožaj na ekranie. Tamu ŭ jaje ulublalisia zaŭsiody.
Pieršy film, u jakim ja jaje pamiataju, viadoma ž, — «Słužbovy raman». I ja da hetaha času lublu jaje Ludmiłu Prakofjeŭnu.
Ale kamiedyja — jana kamiedyja i jość. A ciapier, pierabirajučy ŭ pamiaci jaje roli, ja raptam vyśviatlaju, što zapomniŭ niejkija inšyja, niehałoŭnyja, ledź nie epizadyčnyja — i zusim nie kamiedyjnyja.
Voś nie nadta staraja jašče ŭdava Ahudałava ŭ nielubimym mnoju «Žorstki ramansie» kakietničaje z Knuravym (Piatrenka). A potym adchodzić u bok — i nijakaha kakiectva ŭ sumnych vačach maci, jakaja tolki što pryniała padačku na hańbu dački. I vyjścia ž niama. Hrošaj niama. Dačka — jana biespasažnica.
Voś frejlina Vyrubava, achviara biazvyjścievaj addanaści carskaj familii i adna ź vinoŭnic jaje hibieli, u «Ahonii». Ciažka kulhaje jana, tolki-tolki vykaraskalisia paśla čyhunačnaj katastrofy. I ŭ jaje kačynaj chadzie — niby kulhavaść ŭsioj impieryi: niama na kaho abapiercisia ŭładaru, niama na kaho.
Voś jana ŭ maleńkaj roli ŭ «Stałkiery» Tarkoŭskaha — bjecca ŭ isterycy. Kažuć, što paśla adnaho z dublaŭ pryjšłosia vyklikać chutkuju dapamohu. Adzinaja žančyna ŭ hetym filmie, jana — jak stałkier, jaki moh by vyvieści ŭsich nas adtul, z zony, ale mužyki čamuści imknucca ŭ zonu. I jana zastajecca adna, ź biestałkovym mužam, jaki ničoha inšaha prosta nie ŭmieje…
Jakaja jana ŭ chudziakoŭskim «Pośpiechu»! Aktrysa, jakaja hraje aktrysu, jakaja hraje aktrysu! Zorka hałoŭnaj rasijskaj sceny — BDT! — hraje pravincyjnuju zorku na rolu čechaŭskaj Arkadzinaj! Kožny ruch, kožny pohlad vyvieranyja, čaroŭnyja, niepaŭtornyja.
A «Padmaskoŭnyja viečary»! Kolkich supiernikaŭ źjeła jaje hierainia, pierš čym damahčysia pryznańnia i pośpiechu… I voś prychodzić biazdarnaje, ubohaje dušoj dziaŭčo, kab źjeści jaje samu!
Mnie nie spadabałasia jaje Maskalova ŭ «Dziadźkavym śnie». Napaleonistaści nie chapiła. Jaje Marja Alaksandraŭna — zanadta chatniaja, zanadta maci, kab hladzieć u Napaleony. Ale ž nie abaviazkova jaje pračytańnie Dastajeŭskaha pavinna supadać z pračytańniem luboha inšaha čałavieka na ziamli. Alisa Brunaŭna i ŭ hetaj roli — cudoŭnaja…
I ja chacieŭ by ŭbačyć jaje ŭ Kaciarynie Ivanaŭnie i ŭ łedzi Makbiet. Ale na žal, u hetych rolach jana ŭžo nie vychodzić na scenu…
Ź jubilejem Vas, Alisa Brunaŭna! Doŭhich, jašče bolš doŭhich hadoŭ Vam!
