Bolš za 87% valutnaj vyručki z Rasii Biełaruś atrymała ŭ rasijskich rublach, devalvacyja abiasceniła dachody
Pra heta śviedčać źviestki Nacyjanalnaha banka.
Fota masterforex-v.org.
Usiaho ŭ studzieni—kastryčniku 2014 hoda Biełaruś atrymała z Rasii valutnaj vyručki na 15,22 młrd. dalaraŭ, što na 2,6% mienš u paraŭnańni z anałahičnym pieryjadam minułaha hoda.
Pry hetym valutnaja vyručka Biełarusi ŭ rasijskich rublach skłała ŭ dalaravym ekvivalencie 13,26 młrd. dalaraŭ. Takim čynam, bolš za 87% hrašovych pastupleńniaŭ, što atrymlivaje Biełaruś z Rasii, u studzieni—kastryčniku 2014 hoda było naminavana ŭ rasijskich rublach.
Pradstaŭniki biełaruskaha ŭrada raniej zajaŭlali, što z-za raźlikaŭ u rasijskich rublach eksparciory Biełarusi niasuć značnyja finansavyja straty.
«Devalvacyja rasijskaha rubla pryvodzić da taho, što abiasceńvajecca naša debitorskaja zapazyčanaść, i my niasiem vialikija straty z-za kursavych roźnic. Našy sproby pieravieści prodažy ŭ dalary na rasijskim rynku ni da čaho nie pryviali»,
— kanstatavaŭ ministr pramysłovaści Dźmitryj Kaciarynič, vystupajučy ŭ kancy kastryčnika ŭ pałacie pradstaŭnikoŭ.
Premjer-ministr Michaił Miaśnikovič, vystupajučy ŭ listapadzie ŭ pałacie pradstaŭnikoŭ, zajaviŭ, što z-za devalvacyi rasijskaha rubla praparcyjanalna pavinny byli raści ceny, adnak hetaha nie adbyłosia, i biełaruskija vytvorcy tamu pavinny šukać inšyja rynki zbytu.
«Devalvacyja pavinna była pryvieści da ekvivalentnaha źmianieńnia cen na rasijskim rynku. Na žal, hetaha nie adbyvajecca. Pa hetaj pryčynie pradpryjemstvy imknucca šukać inšyja rynki zbytu», — patłumačyŭ Miaśnikovič.
Ekanamisty miarkujuć, što kali tendencyja ŭmacavańnia biełaruskaha rubla da rasijskaha praciahniecca, to biełaruski ekspart u Rasiju pamienšycca. «Za hety hod my ŭmacavalisia da rasijskaha rubla ŭ realnym vyražeńni prykładna na 20%. Kali takoje budzie praciahvacca i dalej, takaja situacyja moža vylicca ŭ značnaje źnižeńnie biełaruskaha ekspartu ŭ Rasiju», — ličyć ekanamist Biełaruskaha ekanamičnaha daśledča-adukacyjnaha centra (BEROC) Dźmitryj Kruk.
