Miaśnikovič: Rost VUP — pryjarytet numar try
Tempy ekanamičnaha rostu — pryjarytet numar try dla ŭrada, zajaviŭ premjer-ministr Biełarusi Michaił Miaśnikovič, adkazvajučy na pytańni deputataŭ 10 listapada ŭ pałacie pradstaŭnikoŭ.
Jon pryznaŭ, što tempy ekanamičnaha rostu ŭ 2014 hodzie na bolš nizkim uzroŭni, čym płanavałasia z samaha pačatku. «Sapraŭdy, zadańnie va ŭkazie vyznačanaje jak pryrost VUP na 3,3% u 2014 hodzie, majem 1,5%», — kanstatavaŭ Miaśnikovič.
Pry hetym jon źviarnuŭ uvahu, što pavodle vynikaŭ studzienia—kastryčnika čakajecca paskareńnie tempaŭ pramysłovaj vytvorčaści. «Kazać pra toje, što my supakoilisia i nie imkniemsia vyjści na prahnoznyja pakazčyki, nielha. My imkniemsia da hetaha», — skazaŭ Miaśnikovič.
Razam z tym, zaznačyŭ jon, situacyja z ekspartam tavaraŭ zastajecca ciažkaj, uličvajučy vysokija tempy devalvacyi rasijskaha rubla.
«Situacyja takaja, što 92% valutnaj vyručki z Rasii my atrymlivajem u rasijskich rublach. Devalvacyja pavinna była pryvieści da ekvivalentnaj źmieny cen na rasijskim rynku. Na žal, hetaha nie adbyvajecca. Z-za hetaj pryčyny pradpryjemstvy imknucca šukać inšyja rynki zbytu», — rastłumačyŭ Miaśnikovič.
Admoŭna na biełaruskim eksparcie, paviedamiŭ jon, adbivajecca i ŭmacavańnie biełaruskaha rubla da rasijskaj valuty. «Sukupnaść faktaraŭ vielmi niaprostaja i patrabuje ad pradpryjemstvaŭ surjoznych rašeńniaŭ», — zaznačyŭ Miaśnikovič.
U takich umovach, udakładniŭ jon, urad vyznačyŭ dla siabie hałoŭnyja pryjarytety ekanamičnaj palityki.
Hałoŭny pryjarytet zaklučajecca ŭ zabieśpiačeńni finansavaj zbałansavanaści, na druhim miescy rost ekspartu, zabieśpiačeńnie stanoŭčaha salda handlovaha bałansu i palapšeńnie stanu rachunku biahučych apieracyj płaciežnaha bałansu.
«Vy skazali pra VUP, heta pryjarytet numar try», — padkreśliŭ Miaśnikovič, źviartajučysia da deputata, jaki zadaŭ pytańnie pra nizkija tempy ekanamičnaha rostu.
