U jakaści mahčymaha rektara EHU abmiarkoŭvajecca kandydatura Milinkieviča
«Ja taksama ŭ internecie pra heta pračytaŭ. Ale pakul zaŭčasna abmiarkoŭvać, davać intervju. Ja viedaju, što abmiarkoŭvajucca roznyja kandydatury. Ź Biełarusi, nie ź Biełarusi, amierykanskija hramadzianie, litoŭskija, biełaruskija. Rašeńniaŭ pakul nijakich niama», — skazaŭ Alaksandr Milinkievič.
U śpisie kvalifikacyjnych patrabavańniaŭ da budučaha rektara EHU značacca: doktarskaja stupień abo jaje ekvivalent, lidarskija jakaści, zdolnaść da pieraŭtvareńniaŭ, vopyt pracy na kiraŭničaj pasadzie vyšejšaha źviana va ŭniviersitecie, pradprymalnaść, biezdakornaja sumlennaść, enierhičnaść, žyćciaradasnaść i finansavaja praniklivaść. I zdajecca, što Alaksandr Milinkievič padychodzić amal pa ŭsich punktach — čatyry hady zahadvaŭ kafiedraj univiersiteta ŭ Ałžyry, vosiem hadoŭ byŭ dacentam Hrodzienskaha univiersiteta, kandydat fizika-matematyčnych navuk, stažyravaŭsia ŭ Francyi, ZŠA, Hiermanii. Adkazvajučy na pramoje pytańnie ab žadańni ci niežadańni stać rektaram EHU Alaksandr Milinkievič nie chavaje, što tema vyšejšaj adukacyi dla jaho daloka nie čužaja.
«Viedajecie, heta nadzvyčaj składanaje pytańnie i mnie nie chaciełasia b jaho ciapier abmiarkoŭvać, pakul niama nijakaj kankretyki. Razvažać, heta nie vielmi… Viadoma, ja čałaviek, jaki 25 hadoŭ pracavaŭ u vyšejšaj adukacyi, va univiersitecie. I vielmi caniu Jeŭrapiejski humanitarny univiersitet, chaču, kab hety prajekt i dalej raźvivaŭsia, paviarnuŭsia da Biełarusi», — havoryć palityk i hramadski dziejač.
Pradstaŭnica studentaŭ u Sienacie EHU Maryja Ślapcova raskazvaje, što čutki ab mahčymym pryznačeńni Milinkieviča na pasadu rektara pa ŭniviersitecie chodziać.
Maryja kaža, što bolš aktyŭnyja studenty, viadoma, kandydaturu budučaha rektara abmiarkoŭvajuć i chacieli b bačyć na hetaj pasadzie biełarusa.
«Studenty, viadoma, bolš skancentravanyja na vučobie i ich nie vielmi chvalujuć pytańni pieramienaŭ u administracyi. Ź inšaha boku, bolš aktyŭnyja studenty, ź jakimi ja razmaŭlaju, kažuć, što bolš chaciełasia b biełaruskaha rektara».
Pryjom zajavak na pasadu rektara EHU zaviaršajecca 21 listapada. Novy rektar pavinien pačać pracu na pasadzie z pačatkam 2015 hoda
