Hałoŭnamu redaktaru «Recha Maskvy» Vieniadziktavu pahražajuć adstaŭkaj
Staršynia savieta dyrektaroŭ chołdynhu «Hazprom-Miedyja» Michaił Lesin dapuściŭ mahčymaść adstaŭki hałoŭnaha redaktara «Recha Maskvy» Alaksieja Vieniadziktava.
Jak raspavioŭ Lesin RBK, zvalnieńnie žurnalista «Recha Maskvy» Alaksandra Pluščava — sprava vyrašanaja. Kali hałoŭny redaktar «Recha Maskvy» nie pahodzicca z sychodam žurnalista, heta, «całkam mahčyma», skončycca adstaŭkaj samoha Vieniadziktava, zajaviŭ Lesin.
Jon nie staŭ mierkavać, jaki artykuł pracoŭnaha zakanadaŭstva moža być vykarystana ŭ hetym vypadku — «heta jurysty raźbiarucca», skazaŭ jon.
Pa słovach Lesina, jon abmiarkoŭvaŭ zvalnieńnie Pluščava ź Vieniadziktavym napiaredadni ŭviečary, hałoŭny redaktar «pahadziŭsia z tym, što ŭčynak [Pluščava] amaralny» (vierahodna, majecca na ŭvazie sarkastyčny post žurnalista ŭ Tvitery z nahody śmierci syna kiraŭnika administracyi Pucina). Kiraŭnik «Hazprom-Miedyja» paviedamiŭ Vieniadziktavu, što kali toj sam nie prymie rašeńnie ab zvalnieńni, to heta zrobić saviet dyrektaroŭ.
Raniej siońnia Vieniadziktaŭ zajaviŭ RBK, što nie padpisvaŭ zahad ab zvalnieńni Pluščava.
Što tyčycca paviedamleńnia z nahody śmierci starejšaha syna kiraŭnika kramloŭskaj administracyi Siarhieja Ivanova, Alaksandra Ivanova, to post na hetuju temu źjaviŭsia ŭ «tvitary» Pluščava ŭ minułuju sieradu. Praź niekatory čas jon vydaliŭ hety zapis. «Prašu prabačeńnia ŭ tych, kaho pakryŭdziła forma majho pytańnia pra zahinułaha Alaksandra Ivanova. Tvit prybraŭ», — napisaŭ jon ŭ svaim mikrabłohu.
