World of Tanks vyjšła na Android
Raspracoŭka biełaruskaj kampanii Wargaming i adna z samych papularnych u śviecie anłajn-hulniaŭ World of Tanks ciapier moža pachvalicca i viersijaj dla smartfonaŭ i płanšetaŭ na Android, ale pakul tolki ŭ Italii i krainach Skandynavii.
Jak raspaviali partału 4PDA raspracoŭščyki hulni, karystalniki Android zmohuć hulać razam z karystalnikami smartfonaŭ i płanšetaŭ Apple u roŭnych umovach. Pa zaviaršeńni testavaha zapusku na abmiežavanaj terytoryi hulnia stanie dastupnaja pa ŭsim śviecie, ale dakładnaja data nie nazyvajecca.
Hulnia World of Tanks Blitz nie źjaŭlajecca poŭnaj kopijaj World of Tanks. Jana raspracavanaja pad sensarnyja ekrany i bolš słaboje «žaleza», tamu ŭ hulni sproščanaje kiravańnie, mieniej detalovaja hrafika, mienšyja pamiery kartaŭ i kamandaŭ. Dla jaje patrebny asobny ad «nastolnych» tankaŭ akaŭnt. World of Tanks Blitz spažyvaje prykładna 10 Mb trafika na hadzinu hulni.
***
World of Tanks była vypuščanaja ŭ 2010 hodzie biełaruskaj studyjaj Wargaming.net. Hulnia źjaŭlajecca sproščanaj simulacyjaj tankavaha boju na mašynach časoŭ Druhoj suśvietnaj vajny. Mahčymyja jak histaryčnyja bai, tak i sutyčki, naprykład, francuzskaj i kitajskaj techniki. Sama hulnia biaspłatnaja, ale dazvalajucca pakupki za realnyja hrošy bonusaŭ i dadatkovaj techniki, ale takija pakupki nie dajuć pieravahi ŭ bai. Na kaniec leta 2014 hoda ŭ hulni naličvałasia bolš za 100 młn karystalnikaŭ. Akramia «tankaŭ» Wargaming vypuściła «avijacyjnuju» World of Warplanes i anansavała «marskuju» World of Warships.
