Na Danbasie byŭ škvał abstrełaŭ, Ščaście mocna razburanaje
U Łuhanskaj vobłaści bajeviki stralali ŭ rajonach Hornaha, Załatoha, Arechavaha, Čarnuchinaha, Stanicy Łuhanskaj, Sievieradaniecka i Ščaścia, apošniaje mocna razburanaje.
Pra heta paviedamiŭ u zvodcy za 17 vieraśnia pradstaŭnik infarmacyjna-analityčnaha centra RNBA Andrej Łysienka.
«Na ŭschodzie ŭkrainskija vajennyja vykonvajuć zahad ab režymie spynieńnia ahniu. U toj ža čas terarysty praciahvajuć abstreły pazicyj sił ATA», — skazaŭ jon.
«Tak, na praciahu sutak zafiksavanyja abstreły ŭ Danieckaj vobłaści — u rajonie nasielenych punktaŭ Piaski, Krasnahoraŭka, Marjinka, Alaksandraŭka, Novamichajłaŭka, Tonieńkaje, Małaarłoŭka, Arłova-Ivanaŭka, Nižniaja Krynka, Centralny, Hranitnaje, Debalcava, Danieckaje, Staraihnataŭka», — udakładniŭ Łysienka.
Pavodle jaho dadzienych, «u Łuhanskaj vobłaści terarysty abstralali nasielenyja punkty ŭ rajonach Hornaje, Załatoje, Arechavaje, Čarnuchina, Stanica Łuhanskaja, Sievieradanieck i horada Ščaście».
«Z-za masiravanych abstrełaŭ terarystaŭ horad Ščaście atrymaŭ značnyja razbureńni. Padkreślim, što pavodle pałažeńniaŭ mižnarodnych kanviencyj ab praviłach i zvyčajach vajny takija abstreły nasielenych punktaŭ ličacca vajennym złačynstvam», — zajaviŭ Łysienka.
Akramia taho, «bajeviki ažyćciaŭlajuć pierahrupoŭku vakoł horada Debalcava Danieckaj vobłaści i ŭładkoŭvajuć pazicyi na padjezdach da Faščaŭki i Centralnaha Łuhanskaj vobłaści i Kiraŭskaha Danieckaj vobłaści», zajaviŭ jon.
