U HC «Karona» pradajuć knihu, u jakoj «dziaržava Biełarusija» nazvanaja «absurdnaj, niemahčymaj»
Karespandent BiełaPAN ubačyŭ ŭ kniharni, što raźmieščanaja ŭ staličnym handlovym centry «Karona», knihu, jakaja jaho źbiantežyła.
Vydańnie Alaksieja Kafanava «Rasija: šlach da pieramohi» supravadžajecca pretencyjoznym nadpisam na vokładcy: «Ad aŭtara nacyjanalnaha biestsielera «Ruski car Iosif Stalin». Prahartaŭšy knižku naŭhad, akazvajemsia, da prykładu, na staroncy 329, dzie čytajem: «Rasija, Ruś pavinna być u pieršuju čarhu krainaj rusaŭ — biez raździaleńnia na haliny. «Dziaržava Ukraina», «dziaržava Biełaruś» absurdnyja, niemahčymyja. <…> Uźjadnańnie Vialikaj Rasii niepaźbiežnaje, i jano tolki karyść pryniasie ŭsim halinam našaha vialikaha naroda — choć mnohich małarusaŭ zachodnija akupanty i pierakanali za 20 hadoŭ u advarotnym. «Raździalaj i ŭładar» — standartnaja palityka ahresaraŭ. Ničoha, niapravilnyja pierakanańni z časam raśsiejvajucca».
Hartać dalej «biestsieler» z zajezdžanaj vialikadziaržaŭnaj łuchtoj achvota źnikła, a voś dla Respublikanskaj ekśpiertnaj kamisii pa acency infarmacyjnaj pradukcyi na pradmiet najaŭnaści (adsutnaści) u joj prykmiet prajaŭleńnia ekstremizmu tut, biezumoŭna, znojdziecca pažytak dla razvažańniaŭ. Joj i karty ŭ ruki.
Kniha Kafanava vyjšła ŭ śviet u lutym 2014-ha, kali «uźjadnańnie Vialikaj Rasii» ŭžo ažyćciaŭlałasia na terytoryi Ukrainy. I ciažka paspračacca sa śćviardžeńniem aŭtara ab tym, što «niapravilnyja pierakanańni z časam raśsiejvajucca». Nibyta parachavy dym nad Łuhanskam i Iłavajskam, raśsiejvajucca iluzii ŭkraincaŭ ab braterskim staŭleńni i ahulnych karaniach z paŭnočnaj susiedkaj.