Centr analityčnych i hienna-inžyniernych daśledavańniaŭ adkryŭsia pry NAN Biełarusi
U Instytucie mikrabijałohii dziaržaŭnaha navukova-vytvorčaha abjadnańnia «Chimičny sintez i bijatechnałohii» Nacyjanalnaj akademii navuk (NAN) Biełarusi pačaŭ pracu Centr analityčnych i hienna-inžyniernych daśledavańniaŭ (CAHID).
Padčas cyrymonii adkryćcia 9 vieraśnia čyrvonuju stužku pierarezali dyrektar Instytuta mikrabijałohii Emilija Kałamijec i pieršy namieśnik staršyni prezidyuma NAN Biełarusi Siarhiej Čyžyk.
Centr ukamplektavany najnoŭšym navukovym abstalavańniem dla hienna-inžyniernych, malekularna-bijałahičnych i bijachimičnych daśledavańniaŭ. Śpiecyjalisty CAHID zmohuć pravodzić malekularna-hienietyčnuju dyjahnostyku pryrodnych mikraarhanizmaŭ, pierśpiektyŭnych dla bijatechnałahičnaj vytvorčaści; vyvučać pryrodu mietabalitaŭ (praduktaŭ žyćciadziejnaści mikraarhanizmaŭ) štamaŭ, jakija sintezujuć bijałahična aktyŭnyja rečyvy; stvarać sistemy dla malekularnaha kłanavańnia.
Na abstalavańni centra taksama možna stvarać štamy-supierpraducenty bijabutanołu dla atrymańnia bijapaliva novaha pakaleńnia, małočnaj kisłaty dla bijadehradavanych impłantaŭ, fiermient fitazy dla palapšeńnia zasvajalnaści sielskahaspadarčych karmoŭ, vakcynavych złučeńniaŭ dla ŭzmacnieńnia pryrodžanaha imunitetu, a taksama mnohija inšyja rečyvy.
«Usia aparatura i prybory ŭ našym centry — usio samaje sučasnaje, — adznačyła ŭ hutarcy z žurnalistami Emilija Kałamijec. — My nabyli apošniaje słova techniki, tamu siońnia naša biełaruskaja navuka moža pracavać na tym uzroŭni, pra jaki my jašče niadaŭna tolki maryli».
Praca Instytuta mikrabijałohii raniej šmat u čym była źviazana ź sielskaj haspadarkaj, adnak zaraz, skazała dyrektar, najaŭnaść novaha abstalavańnia «adkryvaje šlach dla dalejšaj pracy i ŭ miedycynie, i ŭ pryrodaachoŭnaj tematycy, i ŭ pramysłovaści «.
«My možam pravodzić lubyja pracy pa hienna-inžyniernym kanstrujavańni štamaŭ mikraarhanizmaŭ, možam analizavać pradukty mietabalizmu, jakija atrymlivajucca padčas ich rostu, možam ažyćciaŭlać nakiravany sintez. Takim čynam, my ŭžo siońnia možam pastaŭlać krainie farmsubstancyi, prabijatyčnyja preparaty, praducenty bijabutanołu dla bijaenierhietyki», — dadała Kałamijec.
Niahledziačy na toje što siońnia prysutnaść mikrabijałohii «adčuvajecca va ŭsich halinach», hety profilny instytut NAN Biełarusi stavić pierad saboj zadaču zrabić tak, kab «jaje prysutnaść była paŭnacennaj».
«Centr takuju mahčymaść siońnia daje», — padsumavała Kałamijec.
