Hurtu «Vopli Vidaplasava» sarvali kancerty ŭ Rasii
Hurt admianiŭ kancerty z-za zabarony na ŭjezd u Rasiju, paviedamiŭ lidar «Voplaŭ Vidaplasava» Aleh Skrypka u intervju «Echo Moskvy».
«My ŭ Rasiju jeździć nie možam. U nas byli zapłanavanyja dva kancerty - na Kubani i ŭ Maskvie. Ich admianili, bo my ŭkraincy», — zajaviŭ Aleh Skrypka.
Sa svajho boku, kancertny dyrektar hrupy Anton Fokin zajaviŭ «Ruskaj słužbie novostiej», što aficyjnaj zabarony na praviadzieńnie kancertaŭ u Rasii hrupa nie atrymlivała. «U mianie nijakich aficyjnych papier niama. Byli zapłanavany fiestyvali ŭ Rasii, usio było ŭ padviešanym stanie ŭ suviazi z abstanoŭkaj, jakaja skłałasia. Niejak pa ŭzajemnym žadańni my nie pajechali: nas nie klikali», - skazaŭ Fokin ŭ efiry radyjostancyi.
U ministerstvie kultury RF zajavili, što da zabarony kancertaŭ «Voplaŭ Vidaplasava» dačynieńnia nie majuć. U pres-słužbie viedamstva śćviardžajuć, što daviedalisia ab zabaronie ad žurnalistaŭ.
Raniej byli pieraniesienyja na niavyznačany termin hastroli ŭ Rasii inšaha ŭkrainskaha hurtu — «Akijan Elzy». Ich praviadzieńnie apynułasia pad pytańniem u lutym 2014 hoda, adrazu paśla adchileńnia ad ułady Viktara Janukoviča. Salist hrupy Śviatasłaŭ Vakarčuk adkryta vykazvaŭ padtrymku Majdanu.
