Rasiejcy chočuć kupić akcyi baranavickaha avijazavoda
Rasijskaje AAT «Abjadnanaja avijabudaŭničaja karparacyja» (AAK) płanuje ŭvajści ŭ skład akcyjanieraŭ «558-ha avijaramontnaha zavoda», abiacajučy inviestycyi i pieradaču rabot pa servisnym absłuhoŭvańni samalotaŭ VPS Rasii.
Pra heta 15 žniŭnia zajaviŭ na forumie «Technałohii ŭ mašynabudavańni» rehijanalny dyrektar departamienta mižnarodnaha supracoŭnictva OAK Alaksiej Karaścialoŭ.
«AAK płanuje ŭvajści ŭ skład akcyjanieraŭ «558-ha avijacyjnaha ramontnaha zavoda», — zajaviŭ jon. — Asnoŭnaja zadača — pavieličeńnie zahruzki pradpryjemstva. My płanujem raźvivać tam vytvorčaść kampanientaŭ avijacyjnaj techniki z vychadam na sieryjnuju vytvorčaść».
Pra heta taksama kazaŭ vice-prezident AAT «AAK» Alaksandr Tulakoŭ. Pavodle jaho słoŭ, na baranavicki avijaramontny zavod pastupiać inviestycyi, jakija dazvolać asvoić novyja technałohii i zrabić tańniejšym košt ramontnych pasłuh avijatechniki z Rasii i takich krain, jak Ałžyr i Anhoła. Tulakoŭ zajaviŭ, što AAK na «558-m avijaramontnym zavodzie» płanuje pačać sieryjnuju vytvorčaść kampanientaŭ avijacyjnaj techniki.
Akramia hetaha, Alaksiej Karaścialoŭ rastłumačyŭ, što baranavickamu avijazavodu rasiejcy pieradaduć raboty pa servisnym absłuhoŭvańni vučebna-trenirovačnaha samalota Ł-39, jaki stajaŭ na ŭzbrajeńni VPS Rasii, a taksama ramont indanezijskich Su-30.
Na dumku Karaścialova, pieradača ramontu biełaruskamu pradpryjemstvu dazvolić rasiejcam na 6-8% źnizić košt pasłuh pa ramoncie.
Pradstaŭniki AAK ličać, što padobnyja inviestycyi daduć mahčymaść baranavickamu pradpryjemstvu ŭ 2015 hodzie pavialičyć abjom vytvorčaści da $151 młn, a da 2025 hodzie hetyja pakazčyki davieści da $299 młn.
Jak raspavioŭ hałoŭny inžynier-pieršy namieśnik dyrektara AAT «558 Avijacyjny ramontny zavod» Andrej Tučyn, pakul nie viadoma, na jakich umovach i kolki pracentaŭ akcyj atrymajuć rasijanie. Pakul usio heta znachodzicca na stadyi pieramovaŭ i abmierkavańniaŭ.
«Chaciełasia b, kab heta było realizavana, — rastłumačyŭ Tučyn. — Kali ŭsio pojdzie pa płanie, abjomy vytvorčaści vyrastuć za košt taho, što my budziem vypuskać detali dla rasiejcaŭ i jany buduć nam davać peŭnyja pracy pa ramoncie».
Pa słovach hałoŭnaha inžyniera, rasijskim partnioram nakiravana prapanova ź infarmacyjaj ab patrebnych inviestycyjach, adnak pakul iduć pieramovy i nazyvać kankretnyja sumy rana.
Na dumku Andreja Tučyna, rasijskija inviestycyi dazvolać zavodu pavialičyć abjomy vytvorčaści. Dla hetaha pryjdziecca naroščvać vytvorčyja mahutnaści, što pryviadzie da stvareńnia dadatkovych pracoŭnych miescaŭ, ukaraniennz novych technałohij na pradpryjemstvie.
Realizacyja prajekta nie naniasie nijakaj škody abaranazdolnaści Biełarusi, zapeŭniŭ hałoŭny inžynier avijaramontnaha zavoda. Pavodle jaho słoŭ, abaronny zakaz RB budzie vykonvacca ŭ pieršuju čarhu.
