Miaśnikovič: Vykaranieńniu karupcyi ŭ Biełarusi moža pasadziejničać źnižeńnie ŭzroŭniu administravańnia ekanomiki
Vykaranieńniu karupcyi i złoŭžyvańniaŭ u Biełarusi moža pasadziejničać źnižeńnie ŭzroŭniu administravańnia ekanomiki. Ab hetym zajaviŭ siońnia žurnalistam premjer-ministr Biełarusi Michaił Miaśnikovič, jaki z rabočaj pajezdkaj naviedvaje Mahiloŭskuju vobłaść.
Pavodle słoŭ kiraŭnika ŭrada, siońnia na terytoryju Biełarusi šmat zavozicca impartnych tavaraŭ, jakija jość u dastatkovaj kolkaści ŭ krainie. Rabota z pasrednikami i pasrednickimi schiemami — adnačasova i kanał karupcyi. Heta kali rabota praz pasrednikaŭ pa imparcie viadzie da padaražeńnia nabytaha tavaru. Tut prymianiajucca roznyja šeryja schiemy, adkaty.
Zhodna sa statystykaj, Bresckaja i Hrodzienskaja vobłaści šmat impartnych tavaraŭ zakuplajuć na ŭnutranaj terytoryi — heta impart ad biełarukich pasrednikaŭ. Vialikuju kolkaść impartnych tavaraŭ nabyvajuć sielskahaspadarčyja i budaŭničyja arhanizacyi. «Treba źviarnuć asablivuju ŭvahu na toje, kab vyklučyć hetych pasrednikaŭ i svojeasablivyja niesumlennyja ździełki», — ličyć premjer-ministr.
Nievypadkova heta tema vielmi aktyŭna abmiarkoŭvajecca ŭ hramadstvie i ŚMI. Pierš za ŭsio, heta datyčycca pryniaćcia novych narmatyŭna-zakanadaŭčych aktaŭ, nakiravanych na vykaranieńnie karupcyi i złoŭžyvańniaŭ.
«Ja baču tut dva asnoŭnyja prablemnyja pytańni. Pieršaje — heta toje, što ŭ nas u ekanomicy vielmi vysokaja ŭdzielnaja vaha administravańnia, kali pry zakupkach i navat pry prodažach nie prymianiajucca rynačnyja miechanizmy zdarovaj kankurencyi, a časta ŭsio zaležyć ad čynoŭnika, śpiecyjalista, jaki zajmajecca raźmierkavańniem. Isnujuć čatyry prostyja aryfmietyčnyja dziejańni: administracyjny resurs, abo jak adniać i padzialić, i rynačny — jak dadać i prymnožyć. Tamu čym bolš budzie rynačnych adnosin, tym mienš budzie pažyvy dla roznych karupcyjnych prajaŭ», — pierakanany Michaił Miaśnikovič.
«Adno z važniejšych pytańniaŭ u hetym łancužku — vypusk miascovymi vytvorcami jakasnaj i kankurentazdolnaj pradukcyi, — ličyć premjer-ministr. — Tolki ŭ hetym vypadku možna zabiaśpiečyć rost prodažaŭ. Na žal, siońnia takich tavaraŭ małavata. I technałohii ŭstareli, i kiraŭniki mnohich pradpryjemstvaŭ sastarylisia. Tamu ŭrad pracuje i ŭ častcy ŭdaskanaleńnia mieniedžmientu raboty, i kadravaj rasstanoŭki, i, biezumoŭna, u napramku techničnaha pieraŭzbrajeńnia i madernizacyi pramysłovaha kompleksu krainy».