U Minsku zatrymany ŭradženiec Maskvy, jaki abvinavačvajecca ŭ złačynstvie ekstremisckaj skiravanaści
U Minsku 12 žniŭnia zatrymany ŭradženiec Maskvy 27-hadovy Alaksiej Antanovič, jaki abvinavačvajecca ŭ złačynstvie ekstremisckaj skiravanaści, paviedamlajecca na sajcie Śledčaha kamiteta Rasii.
U infarmacyi havorycca, što hałoŭnym śledčym upraŭleńniem SK RF pa horadzie Sankt-Pieciarburhu raniej paviedamlałasia pra likvidacyju ekstremisckaj hrupoŭki, členy jakoj učyniali złačynstvy na hlebie rasavaj i nacyjanalnaj nieciarpimaści. Na łavie padsudnych apynulisia Hieorhij Cimafiejeŭ, jaki stvaryŭ złačynnuju hrupu, a taksama 11 maładych ludziej va ŭzroście ad 17 da 24 hadoŭ, jakija z 2009 pa 2010 hod, z metaj raspalvańnia rasavaj i nacyjanalnaj nianaviści i varožaści, učynili dziasiatki ciažkich i asabliva ciažkich złačynstvaŭ, siarod jakich zabojstvy, padryŭ aŭtobusnaha prypynku, padpał chrama. Złačyncy fiksavali svaje dziejańni na videa dla raspaŭsiudžvańnia.
Usie členy złačynnaj hrupy byli pryhavoranyja da praciahłych terminaŭ pazbaŭleńnia voli. Padčas śledstva byŭ ustanoŭleny i Alaksiej Antanovič, jakomu vystavili abvinavačańnie ŭ raspalvańni nianaviści i varožaści, učynienaj hrupaj asob (p. «v» č. 2 art. 282 KK RF).
Pavodle viersii śledstva, u śniežni 2009 hoda Antanovič, jakija viedaŭ pra ŭčynienyja členami złačynnaj hrupy złačynstvy, raźmiaściŭ u internecie videarolik sa zvarotam členaŭ złačynnaj hrupy, jaki źmiaščaje ekstremisckija vykazvańni i scenu zabojstva kala adnaho z damoŭ pa praśpiekcie Vieteranaŭ, tym samym raspaŭsiudziŭšy jaho siarod nieabmiežavanaha koła asob. Paśla vystaŭleńnia abvinavačańnia Antanovič chavaŭsia ad orhanaŭ śledstva, u suviazi z čym jon byŭ abvieščany ŭ mižnarodny vyšuk.
Ciapier vyrašajecca pytańnie ab ekstradycyi Antanoviča ŭ Rasiju.
