Aryšt sienatarki Šarejka: pierajšła darohu čynoŭnikam?
Na ptuškafabrycy nazyvajuć svaju viersiju aryštu dyrektarki.
Hanna Šarejka. Fota pridvinje.by.
14 žniŭnia sa zhody savieta respubliki sienatarka Hanna Šarejka była pazbaŭlena deputackaj niedatykalnaści i zatrymana. Jaje vinavaciać u złoŭžyvańni słužbovymi paŭnamoctvami na Viciebskaj brojlernaj ptuškafabrycy, jakuju jana ŭznačalvaje.
Na pradpryjemstvie ananimna raskazvajuć, što pryčynaj aryštu moh stać kanflikt ź inšym pradpryjemstvam. Maŭlaŭ, letaś da dyrektara ptuškafabryki źviarnulisia z pradpryjemstva, jakoje vypuskaje karmy dla ptušak. Prapanavali zaklučyć kantrakt. Šarejka admoviłasia: nie syšlisia na canie-jakaści. U vyniku jana zaklučyła damovu z łatvijskaj kampanijaj. Nibyta navat z ulikam razmytnioŭki atrymlivałasia tańniej, čym zakupać u Biełarusi. Biełaruskaja ž kampanija karystałasia padtrymkaj abłasnych čynoŭnikaŭ. Takoje samaŭpraŭstva kamuści nie spadabałasia.
A pa vynikach 2013 hoda ptuškafabryka apynułasia ŭ minusach, bo hrošy inviestavali ŭ svajo pašyreńnie. I ŭ sukupnaści ŭsio stała padstavaj dla pilnaj pravierki. Mahčyma, niejkija kroki mieniedžaraŭ paličyli pieravyšeńniem słužbovych paŭnamoctvaŭ, adznačajuć na fabrycy.
«Z adnaznačnym vyraznym staŭleńniem da jaje ja nie sutykaŭsia. Ale mała ŭ horadzie, u Biełarusi ludziej, jakich viedajuć jak kiraŭnika kankretnaha pradpryjemstva, jakoje istotna raźviłasia. Fabryka stała znakavym, paznavalnym brendam. Pradukcyja była raznastajnaj. Jany stvaryli ŭłasnuju sietku roźničnaha handlu, kaviarni, restaracyju, miesca adpačynku. Hustoŭnyja, jak pryniata ŭ nas kazać, jeŭrapiejskaha typu miescy. Heta była i inicyjatyva Hanny Vasiljeŭny. Na fabrycy imknucca da kulturnaha adpačynku rabotnikaŭ»,
— raskazaŭ žychar Viciebska Vital.
Viciabčuk Siarhiej zaŭvažyŭ, što pra mahčymy aryšt Šarejka zahavaryli jašče ŭ pačatku lipienia, kali adbylisia aryšty inšych ludziej na fabrycy. I kali padčas «Słavianskaha bazaru» pierad kancertami nazyvalisia sponsary, ahučyli proźvišča i Šarejka. I niekatoryja ździvilisia, bo dumali, što jana ŭžo nie ŭ favory, kali nie pad aryštam. «Kali pra kahości, jak u vypadku z aryštam namieśnika staršyni abłvykankama Kavalovym, chadzili čutki, abmiarkoŭvalisia viersii, to pra jaje ničoha nie kažuć — nijakich viersij ja nie čuŭ», — adznačyŭ Siarhiej.
Pa jaho słovach, fabryka davała pracu vialikaj kolkaści ludziej z navakolnych viosak. «Zarobki tam, nakolki viedaju, dobryja».
A kramy i kaviarni fabryka budavała nie tolki ŭ centry Viciebska, a i ŭ novym rajonie Bileva, dzie jašče navat niama ŭsioj infrastruktury. I ludziam heta padabałasia.
Viciebskaja brojlernaja fabryka — heta vialikaja vytvorčaść, jakaja raźmiaščajecca ŭ roznych miescach. Tut adbyvajecca ŭvieś vytvorčy cykł: ad atrymańnia jajek i vyroščvańnia maładniaku da pierapracoŭki miasa ŭ hatovuju pradukcyju. Fabryka ŭklučaje ŭ siabie cech zavadskoha maładniaku, cech baćkoŭskaha statku kur-niasušak, dva brojlernyja cechi, cech inkubacyi, dva cechi zaboju i pierapracoŭki miasa ptuški, cech hatovaj pradukcyi. U pradpryjemstva jość ułasnyja kramy.
Viciebskaj brojlernaj fabrycy naležyć brend «Hanna».
«Jašče hadoŭ 10 tamu zdavałasia, što nablizicca da ŭzroŭniu zachodniejeŭrapiejskich pradpryjemstvaŭ nierealna. A siońnia ŭžo zamiežnyja śpiecyjalisty dziviacca našym pośpiecham. U pryvatnaści, abjomam i jakaści pierapracoŭki ź miasa ptuški, jakoj na Zachadzie mała chto zajmajecca», — adznačała ŭ adnym ź intervju Šarejka.
