Rahozin zaklikaŭ palakaŭ jeści haroch
Vice-premjer RF Dźmitryj Rahozin pasprabavaŭ u svaim tvitary «padkałoć» palakaŭ, jakija praviali akcyju «Ješ jabłyki na złość Pucinu».
U adkaz na zabaronu Raśsielhasnahladu impartavać u Rasiju polskuju sadavinu i harodninu palaki raźmiaščajuć u sacsietkach foty, na jakich jany jaduć zabaronienuju da impartu ŭ RF pradukcyju.
«Palaki na złość Pucinu vyrašyli «jeści jabłyki i pić sidr». Moža, im jašče haroch zabaranić impartavać?)», — napisaŭ 7 žniŭnia Dźmitryj Rahozin u svaim Twitter.
Ale ž rasijskaha čynoŭnika padviali viedy ekanamičnych paniaćciaŭ.
Bo, kali zabaranić palakam impartavać haroch, dyk rasiejcam pryjdziecca tady jeści jaho samim: impart heta ŭvoz zamiežnaha tavaru ŭ svaju krainu.
Tamu dakładna nieviadoma, što mieŭ na ŭvazie Rahozin. Moža jon sapraŭdy źbiraŭsia pakinuć Polšu biez rasijskaha harochu, a moža razam z demanstracyjaj svajho, miakka kažučy dziŭnaha dla dziaržsłužačaha, pačućcia humaru, vypadkova prademanstravaŭ i adsutnaść elemientarnych viedaŭ u ekanomicy.
Darečy, heta ŭžo nie pieršy pravakacyjny tvit rasijskaha vice-premjera.
U mai hetaha hoda Rumynija zabaraniła vykarystoŭvać jaje pavietranuju prastoru dla pieralotu Rahozina, jaki znachodziŭsia z pryvatnym vizitam u Prydniastroŭi, ŭ Maskvu. U adkaz na heta čynoŭnik u svaim tvitary paabiacaŭ rumynam viarnucca ŭ rehijon na borcie stratehičnaha bambardziroŭščyka Tu-160.
Nahadajem, što Rahozin maje stupień doktara fiłasofskich navuk. U sakaviku hetaha hoda jon razam z šeraham rasijskich palitykaŭ trapiŭ pad sankcyi, jakija praduhledžvajuć zabaronu na ŭjezd u ZŠA, Kanadu, krainy ES i Aŭstraliju, a taksama aryšt aktyvaŭ, jakija znachodziacca na terytoryjach hetych krain.
Apytanka
