Fakty inficyravańnia jeŭrapiejcaŭ virusam Eboła nie paćvierdzilisia
Uspyška epidemii virusa Eboła ŭ Zachodniaj Afrycy nabyła katastrafičnyja maštaby.
Pavodle dadzienych Suśvietnaj arhanizacyi achovy zdaroŭja (SAAZ), na 23 lipienia byŭ adznačany 1201 vypadak zaražeńnia virusam, ad infiekcyi pamierła bolš za 670 čałaviek.
SAAZ vydatkoŭvaje na baraćbu z epidemijaj 100 młn dołaraŭ.
Na nadzvyčajnym samicie, jaki adbyŭsia ŭ u stalicy Hviniei Kanakry, prezidenty Śjera-Leone, Libieryi i Hviniei vyrašyli ŭstalavać sanitarnyja kardony na miežach rehijonaŭ, maksimalna achoplenych virusam Eboła.
«Ale ci dastatkova hetaha, kab praduchilić praniknieńnie śmiarotnaha zachvorvańnia na terytoryju inšych krain i kantynientaŭ?» — piša Deutsche Welle.
«My pavinny sa škadavańniem pryznać, što raspaŭsiudžvańnie virusa Eboła nie ŭdajecca ŭziać pad kantrol», — kaža Makśmilian Hiertler (Maximilian Gertler), terapieŭt, člen daśledčaj hrupy Instytuta imia Robierta Kocha pa baraćbie ź infiekcyjami i ŭdzielnik misii «Daktary bieź miežaŭ» u Zachodniaj Afrycy.
Jon tolki niadaŭna viarnuŭsia z Hviniei i kaža, što vyrašalnuju rolu ŭ baraćbie sa śmiarotnym virusam maje prafiłaktyka, ale u mnohich achoplenych virusam rajonach Afryki pravieści jaje nievierahodna składana, pryznaje Hiertler.
Jeŭropa ŭ niebiaśpiecy?
Vypadak zachvorvańnia ŭ Ispanii, jak i padazreńni na zaražeńnie virusam Eboła ŭ Łondanie i Birminhiemie nie paćvierdzilisia.
U hrupie ryzyki apynulisia jeŭrapiejcy, što viarnulisia z krain, dzie byli zafiksavanyja ŭspyški samaj niebiaśpiečnaj na siońniašni dzień epidemii. Ale niahledziačy na toje, što tryvoha akazałasia pamyłkovaj, niespakoj u Vialikabrytanii narastaje.
Brytanski ŭrad stvaryŭ kryzisny štab «Kobra», meta jakoha — vyznačyć sposaby baraćby z zachvorvańniem. Ministr zamiežnych spraŭ Vialikabrytanii Filip Chamand nazvaŭ epidemiju lichamanki Eboła surjoznaj pahrozaj i vykazaŭ zaniepakojenaść tym, što ŭ krainu moža prybyć čałaviek, infikavany śmiarotnym virusam.
Jeŭrapiejskija krainy pavysili ŭzrovień achovy miežaŭ.
Na italjanskaje ŭźbiarežža štodnia vysadžvajucca sotni vychadcaŭ z Afryki. Siarod ich šmat žycharoŭ Śjera-Leone.
U italjanskim ministerstvie achovy zdaroŭja ŭpeŭnienyja, što, choć niebiaśpieka i isnuje, ale troch tydniaŭ inkubacyjnaha pieryjadu dastatkova dla taho, kab simptomy zachvorvańnia ŭ nielehalnych mihrantaŭ paśpieli prajavicca jašče padčas ich padarožža praz akijan. Stan zdaroŭja ŭsich, chto prybyvaje ŭ Italiju, praviarajecca na miescy ekśpiertami ŭ ramkach prahramy pa praduchileńni karablekrušeńniaŭ MareNostrum i śpiecyjalna padrychtavanymi supracoŭnikami.
Ministerstva achovy zdaroŭja Francyi taksama pierakananyja, što ŭ krainie jość usie mahčymaści dla praduchileńnia raspaŭsiudžvańnia śmiarotnaha zachvorvańnia.
Bielhijski prafiesar Piter Pijot, dyrektar Łondanskaj škoły hihijeny i trapičnaj miedycyny, jaki znachodziŭsia ŭ składzie hrupy navukoŭcaŭ, što vyjavili ŭ 1976 hodzie virus Eboła, upeŭnieny: ryzyka jaho raspaŭsiudžvańnia vielmi nievialikaja.
Kali infikavany virusam čałaviek pajedzie ŭ Jeŭropu, ZŠA ci krainy Afryki, to heta nie paciahnie za saboj ŭspyški epidemii, zajaviŭ vučony ŭ intervju ahienctvu AFP.
«Ja nie dumaju, što treba turbavacca z-za vierahodnaści raspaŭsiudžvańnia lichamanki Eboła siarod žycharoŭ Jeŭropy. Dla taho, kab heta adbyłosia, nieabchodnyja bolš ciesnyja kantakty z tymi, chto zaražany virusam», — pierakonvaje prafiesar Piot.
«Jak epidemijołah ja znachodziŭsia ŭ pryvilejavanaj situacyi i faktyčna nie ŭstupaŭ u kantakt z chvorymi, — raspaviadaje adzin z adkryvalnikaŭ virusa Eboła. — A ŭ tych redkich vypadkach, kali heta davodziłasia rabić, kantakt ažyćciaŭlaŭsia praz ščylnyja słai achoŭnaha kaściuma. U minułym jašče ni adzin naš supracoŭnik nie zaraziŭsia i nie staŭ pryčynaj praniknieńnia virusa na terytoryju jakoj-niebudź krainy».
