Aktyvista Viniarskaha chočuć aficyjna papiaredzić za «ekstremizm»
Aktyvista «Eŭrapiejskaj Biełarusi» Maksima Viniarskaha vyklikajuć u Frunzienski RUUS Miensku, kab vynieści aficyjnaje papiaredžańnie za «ekstremizm».
Aktyvist atrymaŭ pozvu za podpisam staršaha inspektara Frunzienskaha RUUS majora Ŭładzimiera Čajkoŭskaha.
U poźvie havorycca, što Viniarski pavinien źjavicca 7 žniŭnia dla vyniasieńnia aficyjnaha papiaredžańnia. Pra «ekstremizm» tam nia zhadvajecca. Adnak pravaabaroncy vyličyli jaho «śled» pavodle ŭskosnaj infarmacyi, paviedamlaje sajt pravaabarončaha centru «Viasna».
U razmovie z karespandentam Svabody Maksim Viniarski adznačyŭ, što ŭpieršyniu sutykajecca z takim farmatam pieraśledu.
«U poźvie nie paznačana, ź jakoj pryčyny. Tam havorycca, što adpaviedna z artykułam 10 zakonu ad 4 lutaha 2007 hodu № 3. Mahčyma, što heta zakon pra «ekstremizm». Ale ŭ poźvie heta nie paznačana i sama nahoda nie tłumačycca. Tamu zaŭtra pryjdziem, pasłuchajem, što skažuć. Mianie tak zapužać nie atrymajecca. Kali heta sproba zapałochać, to hetaja sproba daremnaja», — skazaŭ aktyvist.
U traŭni Viniarski adbyŭ 12-sutkavy aryšt. Zatrymali jaho 22 krasavika ŭ Miensku na vychadzie z handlovaha centru «Karona». Aktyvistu zajavili, što jon «padobny da čałavieka, jaki znachodzicca ŭ vyšuku», adnak užo ŭ adździaleńni milicyi jaho abvinavacili ŭ niepadparadkavańni i skłali pratakoł ab administracyjnym pravaparušeńni. U toj ža dzień sudździa Frunzienskaha sudu Miensku Ludmiła Łapo prysudziła Viniarskamu 12 sutak aryštu. U turmie jon abviaściŭ haładoŭku. Na volu jon vyjšaŭ pierad pačatkam čempijanatu śvietu pa chakiei ŭ Miensku, jaki raniej zaklikaŭ bajkatavać.
