Pa rašeńni suda chołdynh «Marka» pavinien vypłacić bolš za 10 miljonaŭ rubloŭ uładalniku abrabavanaha «Mercedes S500 AMG»
Sud Kastryčnickaha rajona Viciebska zadavoliŭ pazoŭ Arkadzia Baroŭskaha da kirujučaj kampanii chołdynhu «Biełaruskaja harbarna-abutkovaja kampanija «Marka» ŭ pakryćci škody, naniesienaj u vyniku kradziažu lusterka z aŭtamabila «Mercedes S500 AMG», pakinutaha ŭ parkinhu HC «Marka-Sici».
Jak raspavioŭ spadar Baroŭski, 22 lipieni adbyłosia apošniaje pasiadžeńnie suda Kastryčnickaha rajona pa hetaj spravie i rašeńnie było pryniata na jaho karyść: adkazčyk pavinien vypłacić pazoŭniku 1,5 młn rubloŭ u jakaści kampiensacyi za maralnuju škodu, pakryć 5,3 młn rubloŭ, vydatkavanych na advakata, i apłacić košt vykradzienaha lusterka ŭ pamiery 3,5 z ulikam jaho 65% znosu zhodna z acenkaj BiełHPP.
Jak paviedamili Arkadziu Baroŭskamu ŭ sudzie 4 žniŭnia, pradstaŭniki «Marka» nie pahadzilisia z rašeńniem suda pieršaj instancyi i abskardzili jaho ŭ Viciebskim abłasnym sudzie. Adnak paźniej Baroŭskamu patelefanavali z «Marka» i zapeŭnili, što kasacyjnuju skarhu jany nie padavali i rychtujuć da vypłaty pryznačanaj sudom sumy.
Sam Arkadź vyniesieny vierdykt ličyć spraviadlivym i zadavoleny im, niahledziačy na toje, što 10 miljonaŭ rubloŭ kampiensacyi maralnaj škody źmienšylisia da 1,5 młn rubloŭ.
Taksama jon ličyć, što pośpiech jaho spravy moža padšturchnuć i inšych hramadzian da abarony svaich intaresaŭ praz sud u sprečkach z bujnymi kampanijami.
Nahadajem, što ŭ kancy 2013 hoda Arkadź Baroŭski zaklučyŭ damovu z parkinham u HC «Marka-Sici» i pastaviŭ tam na zachoŭvańnie svaju mašynu. Adnak praź niekatory čas vykryŭ prapažu škła levaha lusterka. Uładalniki parkinha admovilisia kampiensavać košt vykradzienaj detali, bo paličyli, što klijent parušyŭ umovy damovy, i paciarpieły byŭ vymušany źviarnucca ŭ sud.
