Infarmacyju ab uznaharodžańni Bakijeva ordenam Družby narodaŭ u Minsku nie kamientujuć
U Administracyi prezidenta Biełarusi i biełaruskim MZS nie kamientujuć infarmacyju ab uznaharodžańni źvierhnutaha prezidenta Kyrhyzstana Kurmanbieka Bakijeva vysokaj dziaržaŭnaj uznaharodaj Respubliki Biełaruś — ordenam Družby narodaŭ.
Paviedamleńni ab uznaharodžańni Bakijeva ŭ Biełarusi ordenam Družby narodaŭ raspaŭsiudzili 5 žniŭnia niekatoryja kirhizskija ŚMI. U pryvatnaści, partał www.kabarlar.org apublikavaŭ fotazdymki ordena i vinšavalnaha lista Bakijevu za podpisam Alaksandra Łukašenki, jakoje datavanaje 1 žniŭnia 2014 hoda — u dzień naradžeńnia eks-prezidenta Kyrhyzstana.
«Pavažany Kurmanbiek Salijevič, darahi siabar. Ščyra vinšuju ciabie ź jubilejem. I vielmi rady, što ty adznačaješ jaho ŭ Biełarusi. Kožny čałaviek, i tym bolš palityčny i dziaržaŭny dziejač, pieražyvaje niaprostyja momanty. Pry hetym słabyja ludzi łamajucca, mocnyja stanoviacca jašče bolš macniejšymi i prachodziać sapraŭdnaje hartavańnie, — havorycca ŭ liście. — Pierakanany, što taja niespraviadlivaść, ź jakoj tabie daviałosia sutyknucca, rana ci pozna zakončycca. I ty vierniešsia na rodnuju ziamlu jak palityk, jaki ŭnios vialiki ŭkład u jaje praćvitańnie i dabrabyt. I samaje hałoŭnaje — ty vielmi bahaty čałaviek, tamu što ŭ ciabie jość nie tolki Kyrhyzstan, ale i tvaja druhaja Radzima — Biełaruś».
Pasoł Biełarusi ŭ Biškieku Viktar Dzienisienka byŭ vyklikany ŭ MZS Kyrhyzstana dla tłumačeńniaŭ nakont hetaha, paviedamiła 6 žniŭnia infarmahienctva 24.kg. Pasła, u pryvatnaści, paprasili aficyjnaha paćviardžeńnia hetaj infarmacyi. Dzienisienka zajaviŭ, što «nie vałodaje padobnymi źviestkami», i «abiacaŭ prainfarmavać MZS Kyrhyzstana «pa sutnaści zakranutaha pytańnia ŭ samy najbližejšy čas».
U Ministerstvie zamiežnych spraŭ Biełarusi BiełaPAN nie stali kamientavać situacyju z vyklikam pasła ŭ MZS Kyrhyzstana. A kiraŭnik pres-słužby biełaruskaha prezidenta Andrej Papoŭ na pytańnie, ci padpisvaŭ Alaksandr Łukašenka ŭkaz ab uznaharodžańni Kurmanbieka Bakijeva ordenam Družby narodaŭ, zajaviŭ, što nijakaj infarmacyi nakont hetaha ŭ jaho niama.
***
Kurmanbiek Bakijeŭ zajmaŭ pasadu prezidenta Kyrhyzstana z 2005 hoda. 19 krasavika 2010 hoda paśla dziaržaŭnaha pieravarotu jon ź nieaficyjnaj žonkaj i dvuma dziećmi pryjechaŭ u Biełaruś pa asabistym zaprašeńni Łukašenki. Pavodle nieaficyjnaj infarmacyi, u žniŭni taho ž hoda jon atrymaŭ biełaruskaje hramadzianstva. Novyja ŭłady Kyrhyzstana nieadnarazova źviartalisia ŭ Hienprakuraturu Biełarusi z prośbaj ab vydačy Bakijeva, ale atrymlivali admovu. Na dumku biełaruskaha boku, pravavych padstaŭ dla zadavalnieńnia prośby ab vydačy Bakijeva niama.
