Nastup na Danieck i Łuhansk anansavać nie buduć
U Radzie nacyjanalnaj biaśpieki i abarony Ukrainy zajaŭlajuć, što paviedamiać ab apieracyi pa vyzvaleńni Łuhanska i Daniecka tolki paśla jaje zaviaršeńnia.
Pra heta na bryfinhu ŭ aŭtorak paviedamiŭ śpikier Infarmacyjnaha centra RNBA Andrej Łysienka.
«Kab vy razumieli: Danieck i Łuhansk — heta nie niejkaja krepaść z vysokimi ścienami. Heta pramysłovyja harady, u vakolicach jakich pryvatny siektar, dzie žyvuć ludzi. Hetyja rajony taksama ličacca Danieckam i ŭ hetyja rajony padyšli hałoŭnyja siły ATA i terytaryjalnyja bataljony, ale heta nie aznačaje, što ŭžo pačaŭsia niejki šturm. Heta idzie padrychtoŭka da vyzvaleńnia horada», — adznačyŭ Łysienka.
«Tamu my nie budziem abjaŭlać ab pačatku nastupu my budziem kazać tolki ab vyzvaleńni hetych haradoŭ», - adznačyŭ jon.
Jak viadoma, u paniadziełak pradstaŭniki bataljonaŭ «Azoŭ» i «Šachciorski» abviaścili pra šturm Daniecka. Razam z tym paźniej stała viadoma, što častka bajcoŭ trapiła ŭ zasadu i siły ATA panieśli straty.
