Biełaruś płanuje stvaryć tranśmiežavyja pryrodna-zapaviednyja abjekty ź Litvoj, Łatvijaj i Ukrainaj
Biełaruś płanuje stvaryć tranśmiežavyja pryrodna-zapaviednyja abjekty ź Litvoj, Łatvijaj i Ukrainaj. Heta praduhledžana Nacyjanalnaj stratehijaj raźvićcia sistemy asabliva padachoŭnych pryrodnych terytoryj (APPT) da 1 studzienia 2030 hoda, zaćvierdžanaj pastanovaj Savieta ministraŭ № 649 ad 2 lipienia. Dakumient nabudzie moc 1 studzienia 2015 hoda.
Jak paviedamlaje pres-słužba Saŭmina, u pieryjad dziejańnia stratehii płanujecca stvaryć tranśmiežavyja asabliva padachoŭnyja pryrodnyja terytoryi «Vilejty — Aduciškis» (Biełaruś — Litva), «Ryčy — Salenie» (Biełaruś — Łatvija), «Almanskija bałoty — Pierabrody» (Biełaruś — Ukraina). Aprača taho, praduhledžana farmiravańnie tranśmiežavych bijaśfiernych reziervataŭ. Płanujecca, što nie mienš jak try terytoryi atrymajuć mižnarodny status.
Nacyjanalnaja stratehija raźvićcia sistemy APPT stvorana na padstavie navukovaha abhruntavańnia, padrychtavanaha Navukova-praktyčnym centram NAN Biełarusi pa bijaresursach, i analizu mižnarodnaha vopytu pa raspracoŭcy stratehičnych dakumientaŭ, skiravanych na raźvićcio sistemy asabliva padachoŭnych pryrodnych terytoryj.
Zhodna z vynikami daśledavańniaŭ, «stvareńnie na terytoryi krainy APPT — najbolš efiektyŭny sposab zachavańnia kaštoŭnych pryrodnych kompleksaŭ i abjektaŭ, zabieśpiačeńnia ekałahičnaj raŭnavahi i ŭstojlivaha raźvićcia pryrodnych sistem», zaznačyli ŭ pres-słužbie.
Sistema asabliva padachoŭnych pryrodnych terytoryj Biełarusi ŭklučaje 1.213 abjektaŭ, u tym liku adzin zapaviednik, čatyry nacyjanalnyja parki, 85 zakaźnikaŭ respublikanskaha značeńnia (31 łandšaftny, 38 bijałahičnych, 16 hidrałahičnych), 249 zakaźnikaŭ miascovaha značeńnia, 306 pomnikaŭ pryrody respublikanskaha i 568 — miascovaha značeńnia. Realizacyja Nacyjanalnaj stratehii raźvićcia sistemy APPT da 1 studzienia 2030 hoda «dazvolić całkam zaviaršyć farmiravańnie sistemy APPT», miarkujuć u Saŭminie.
Aprača taho, stratehijaj praduhledžana zachavańnie naturalnych abo słaba źmienienych bałotnych ekasistem. Tak, z dapamohaj sučasnych technałohij i abstalavańnia płanujecca ačyścić ad chmyźniaku i tryśniahu kala 3,5 tys. ha nizinnych bałot.
Čakajecca, što da 2030 hoda kolkaść turystaŭ, jakija naviedvajuć asabliva padachoŭnyja pryrodnyja terytoryi, pavialičycca nie mienš jak na 80%. Praduhledžana raźvićcio takich vidaŭ turystyčnaj dziejnaści, jak nazirańnie za ptuškami, bataničny i navukovy turyzm. Dla hetaha płanujecca raźvivać turystyčnuju infrastrukturu, a taksama pavyšać uzrovień daśviedčanaści hramadstva ab stanie APPT i mierapryjemstvach, jakija pravodziacca tam.
Praduhledžvajecca taksama, što realizacyja dakumienta dazvolić udaskanalvać miechanizmy kiravańnia i achovy APPT, praviadzieńnia na hetych terytoryjach manitorynhavych mierapryjemstvaŭ i rehulavańnia haspadarčaj dziejnaści.
