Bajeviki z «Hradaŭ» zabili ad 30 da 50 i paranili bolš za 100 ukrainskich vajskoŭcaŭ kala Zialenapolla
Bajeviki z ustanovak «Hrad» abstralali pazicyi sił ATA ŭ Zialenapolli (Łuhanskaja vobłaść), jość zahinułyja siarod vajskoŭcaŭ.
Pra heta paviedamiŭ pres-sakratar ATA Uładzisłaŭ Sielaźnioŭ. «Fakt taho, što pa Zialenapolli bajeviki z «Hradaŭ» adpracavali — tak, siarod našych sił straty — tak, detali buduć paźniej i chutčej za ŭsio na samym vysokim uzroŭni», — skazaŭ jon.
«Paćviardžaju hetyja padziei, ale pakul nijakich detalaŭ skazać nie mahu, kolkaść achviar udakładniajecca», — dadaŭ pradstaŭnik ATA.
Pa słovach aktyvista Majdanu Uładzimira Parasiuka, tut była abstralana mataryzavanaja bryhada, što prybyła ź Lvoŭskaj vobłaści.
Jon napisaŭ: «Tolki što paviedamili vielmi niepryjemnuju navinu. Siońnia ŭ 05:00 ranicy kala v.Zialonapolle Łuhanskaj vobł. rasijskija bajeviki z ŭstanoŭki «Hrad» abstralali našych chłopcaŭ z 24-j mataryzavanaj bryhady (Javaroŭščyna, Lvoŭskaja vobł.) Vialikaja kolkaść paranienych i zabitych. Suviazi niama, usio zhareła. Padmoha nie prychodzić»
«Pra hety žach mnie paviedamiŭ moj sabrat, jaki ciapier tam», — dadaŭ jon. Pa słovach Parasiuka, pa nieaficyjnych dadzienych kolkaść zahinułych vajskoŭcaŭ — kala 30 čałaviek i bolš za 100 paranienych.
U svaju čarhu, Kanstancin Palakoŭ, jaki słužyć u 79-j bryhadzie, adznačaje,
što ad pieršaha bataljona bryhady faktyčna ničoha nie zastałosia paśla abstrełu siońnia nočču.
«Ja słužu ŭ druhim bataljonie 79-j (majecca na ŭvazie 79-ja Mikałajeŭskaja aeramabilnaja bryhada). Siońnia nočču jany prajšli mima nas. Mieŭ kantakty z bajcami pieršaha. Za imi vyjšła kałona. Viarnucca — daviedajusia bolš», - piša Palakoŭ.
U svaju čarhu kamandzir danieckich bajevikoŭ Ihar Strałkoŭ paviedamiŭ na hety kont: «Paćviardžaju. Kałona razhromlena «ŭ chłam»».
Źviestak pra straty siarod vajskoŭcaŭ jon nie pryvioŭ.
«U pasiołku Zialenapolle ŭ vyniku abstrełu terarystami ź sistemy «Hrad» zahinuła bolš za 30 vajskoŭcaŭ».
Pra heta ŭ chodzie bryfinhu zajaviŭ daradca ministra ŭnutranych spraŭ Zoran Škirak, pieradaje karespandent RBK-Ukraina.
«Pakul infarmacyja taja, što jość - 30 zabitych. Ja dapuskaju, što achviar u vyniku budzie bolš», - zajaviŭ Škirak.
Jak piša pradstaŭnik «Svabody» Rusłan Andryjka ŭ svaim Facebook, boj adbyŭsia kala 4-5-j ranicy. Byli abstralanyja 24 i 79 bryhady z «Hradu» ź vialikaj adlehłaści, prykładna 20 km. «Navat nielha było ŭbačyć krynicu ahniu. Patrapili ŭ bojeprypas u tym liku. Zahinuła prynamsi 25 čałaviek, paraniena bolš za 100», - napisaŭ Andryjka.
