Кружэлку з аўтографамі Уладзіміра Мулявіна і іншых музыкаў «Песняроў» прадаюць за 1500 рублёў
На дыску запісаны галоўныя хіты легендарнага калектыву.
Фота: kufar.by
На «Куфры» з'явілася аб'ява: пласцінку з аўтографамі Уладзіміра Мулявіна і музыкамі ансамбля «Песняры» прадаюць за 1500 рублёў, заўважыла «Камсамолка».
Прадавец піша, што стан вініла выдатны, і дадае: «На адным баку пласцінкі ледзь прыкметная вельмі тонкая драпіна. Пласцінка была падпісаная ў Мінску. Арыенціровачна — 1978-1980 гг. Больш падрабязная інфармацыя недаступная, бо сведка памёр у 2018 г.»
На дыску запісаны галоўныя шлягеры «Песняроў»: «Крык птушкі», «Волагда», «Белоруссия», «Белавежская пушча». Таксама ёсць песні «Явар і каліна», «Да трэціх пеўняў», «Пацалунак», «Па ваду ішла». Інакш кажучы, вельмі вядомы рэпертуар.
Канверт кружэлкі з аўтографамі. Фламастарам на ім распісаўся Уладзімір Мулявін. Фота: kufar.by
На адным баку канверта — аўтограф Уладзіміра Мулявіна фламастарам. На адвароце — яго ж подпіс шарыкавай ручкай. А таксама (з адназначна вядомых) аўтографы піяніста калектыву Анатоля Гілевіча і вакаліста ды альтыста Валерыя Дайнэкі. Таксама ля свайго прозвішча ў радку аўтарства песні «Пацалунак» распісаўся кампазітар Ігар Лучанок.
Адварот канверта кружэлкі з аўтографамі. Фота: аб'ява на kufar.by
Кружэлку прадавец з Бабруйска Магілёўскай вобласці ацаніў у 1500 рублёў. Сярэдні кошт вінілавых дыскаў-гігантаў легендарнага беларускага ансамбля «Песняры» складае ад 3 да 85 рублёў у залежнасці ад ступені рэдкасці і захаванасці. Так, найбольш высока цэніцца падвойны альбом «Праз усю вайну» 1985 года.
Чытайце таксама:
У Мінску прадаюць кватэру Уладзіміра Мулявіна
Выявілася, што саліст «Песняроў» Леанід Барткевіч — родзіч аднаго з айцоў БНР
У серыяле пра «Песняроў» заблюрылі сцэны з акцёрам-купалаўцам. Проста паглядзіце на гэтыя кадры
Стары хіт «Песняроў» увайшоў у саўндтрэк да камп'ютарнай гульні
