Пачаўся суд над экс-старшынёй сельсавета, замяшаным у сэкс-скандале з ВІЧ-інфекцыяй
У судзе Бабруйска і Бабруйскага раёна пачалі разглядаць крымінальную справу супраць былога старшыні Вішнеўскага сельсавета. Мікалай Равянкоў замяшаны ў сэкс-скандале з 14-гадовай школьніцай, якая заразілася ВІЧ-інфекцыяй.
Судовы працэс закрыты. Равянкова абвінавачваюць па чатырох артыкулах Крымінальнага кодэкса, сказаў намеснік старшыні суда Артур Красуцкі: «Распусныя дзеянні», «Згвалтаванне», «Гвалтоўныя дзеянні сэксуальнага характару» і «Палавыя зносіны і іншыя дзеянні сексуальнага характару з асобай, якая не дасягнула шаснаццацігадовага ўзросту».
56-гадовага старшыню сельсавета затрымалі 21 лістапада 2016 года. Чыноўніку прад'явілі абвінавачанне ў палавых зносінах і дзеяннях сэксуальнага характару з малалетняй жыхаркай вёскі Стасеўка. Скандал разгарэўся пасля таго, як высветлілася, што 14-гадовая школьніца з'яўляецца носьбітам ВІЧ-інфекцыі.
Школьніца зацяжарыла. Маці настаяла на аборце, бо разумела, што яна «не пацягне» выхаванне сваіх дзяцей і дзіцяці малодшай дачкі, распавяла яна TUT.BY. Аналізы, якія здала яе дачка перад штучным перарываннем цяжарнасці, паказалі, што дзяўчынка з'яўляецца носьбітам ВІЧ-інфекцыі.
Па словах маці, хлопцы, з якімі сустракалася яе дачка, здалі аналізы, якія былі адмоўнымі на ВІЧ. Аб інтымных адносінах з 56-гадовым старшынёй сельсавета і былым настаўнікам дзяўчынка распавяла, калі пачалі высвятляць, ад каго яна магла заразіцца.
Напярэдадні арышту Равенка напісаў заяву на звальненне па ўласным жаданні з пасады старшыні сельскага выканкама, яго таксама пазбавілі дэпутацкага мандата.
Школьніца, у якой выяўлена ВІЧ-інфекцыя, не панясе адказнасці за яе распаўсюд.
