Індыйскіх дактароў навучаць абараняцца ад пацыентаў
Сотні дактароў у адной з буйных бальніц Індыі ў маі пачнуць наведваць заняткі па самаабароне. Яны павінны навучыцца абараняць сябе ад хворых і іх сваякоў, паведамляе ВВС.
Штодзённыя курсы ў Індыйскім інстытуце медыцынскіх навук у Дэлі павінны навучыць персанал абараняць сябе ад пацыентаў і іх сваякоў. Навучаць дактароў будуць прафесійныя спартсмены, якія займаюцца баявымі мастацтвамі.
Апошнія даследаванні паказваюць, што летась фізічнаму нападу або абразам падвергнулася 40% дактароў, піша Hindustan Times.
У сакавіку на фоне паведамленняў аб трох выпадках прымянення гвалту супраць медыкаў больш за тры тысячы супрацоўнікаў аддзяленняў хуткай дапамогі і паліклінік ў штаце Махараштра зладзілі забастоўку ў знак салідарнасці з пацярпелымі калегамі.
На працягу пяці дзён медыкі-пратэстоўцы працавалі ў касках, а затым папрасілі кіраўніцтва арганізаваць курсы самаабароны.
З 15 мая лекары пачнуць штодзённыя трэніроўкі тхэквандо. Асноўны курс будзе доўжыцца шэсць месяцаў. Жадаючыя дасягнуць больш высокіх вынікаў могуць прайсці паглыбленую праграму, разлічаную на два з паловай гады.
