Вядомага расійскага тэлевядучага затрымалі ў цэнтры Масквы ў касцюме пеніса ФОТАФАКТ
Фота Сяргея Ержанкова
Тэлевядучы тэлеканала «Дождь» Павел Лабкоў затрыманы ў цэнтры Масквы ў касцюме мужчынскіх геніталій.
Перад тым, як адбылося затрыманне, Лабкоў зняўся побач з інсталяцыяй, якая сімвалізуе велікоднае яйка, якую ўсталяваў гарадскі камітэт па добраўпарадкаванні.
«Інсталяцыя ад Пятра Палыча Бірукова і дэпартамента па добраўпарадкаванні. Паліцыя не ацаніла — Пашу затрымалі», - адзначыў калега затрыманага Сяргей Ержанкоў.
У гутарцы з Бі-бі-сі Ержанкоў удакладніў, што Лабкова даставілі ў міліцыю, убачыўшы ў яго дзеяннях парушэнне грамадскага парадку.
Карыстальнікі сацсетак адзначаюць, што медыцынская клініка «Мядок» мінулай восенню выпускала на вуліцы ў якасці «жывой рэкламы» прамоўтэраў у касцюме жаночых геніталій. Тая рэкламная кампанія абышлася без затрыманняў.
Павел Лабкоў працуе на «Дожде» з 2012 года. Да гэтага ён доўга працаваў на НТВ, дзе апроч іншага вёў перадачу «Расліннае жыццё» і займаўся папулярызацыяй батанікі. Ён таксама вядомы асветніцкай працай па пытаннях СНІДа.
Пазней стала вядома, што Паўла Лабкова аштрафавалі на 500 рублёў за парушэнне грамадскага парадку, канфіскавалі касцюм і адпусцілі.
