Экс-кіраўнік «Мотавела» Аляксандр Мураўёў прысуджаны да 11 гадоў зняволення
Архіўнае фота Сяргей Гудзілін
Бізнэсмэн, адзін з былых уладальнікаў завода «Мотавела», Аляксандр Мураўёў прысуджаны да 11 гадоў пазбаўлення волі. Прысуд абвешчаны сёння ў судзе Фрунзенскага раёна Мінска.
Аляксандр Мураўёў прысуджаны да пазбаўлення волі тэрмінам на 11 гадоў з адбываннем пакарання ў калоніі ўзмоцненага рэжыму, з канфіскацыяй маёмасці і пазбаўленнем права займаць пэўныя пасады.
Аляксандр Мураўёў быў затрыманы супрацоўнікамі КДБ у пачатку чэрвеня 2015 года. Ён спрабаваў вылецець з мінскага аэрапорта ў сталіцу Аўстрыі, дзе знаходзіцца офіс яго інвестыцыйнай кампаніі ATEC. У 2007 годзе зарэгістраваны ў Аўстрыі ATEC Holding набыў «Мотавела».
Бізнэсоўцу было прад'яўленае абвінавачванне ў здзяйсненні злачынстваў, прадугледжаных ч.4 арт.209, ч.4 арт.16 і ч.4 арт.210, ч.4 арт.16 і ч.2 арт.243, ч.6 арт.16 і ч.2 арт.243 КК.
