Лукашэнка: Мы нікому не дазволім зневажаць наш народ і дзяржаву
Нікому не будзе дазволена зневажаць беларускі народ і дзяржаву, заявіў Аляксандр Лукашэнка, наведваючы ў свята Раства Хрыстовага Свята-Духаў кафедральны сабор Мінска.
Паводле яго слоў, мінулы год склаўся няпроста, асабліва ва ўзаемаадносінах з найбліжэйшымі суседзямі і партнёрамі. «Гэта не дазволіла нам (хоць крыху, праўда) выйсці на тыя запланаваныя рубяжы, на якія мы спадзяваліся. Але я думаю, гэта праблема ўлад. Яна вырашальная», — адзначыў Лукашэнка.
«Вы павінны разумець галоўную формулу нашых дзеянняў: мы нікому не дазволім зневажаць наш народ і дзяржаву. Гэта ляжыць у аснове. Калі хтосьці гэтага не разумее, тады нам няпроста будзе з імі не тое што будаваць адносіны, але і размаўляць», — цытуе Лукашэнку яго прэс-служба.
«Мы нікому не можам аддаць гэтую зямлю і гэтую дзяржаву. Яна нам дасталася ў няпростай гістарычнай рэчаіснасці. Прама скажам, у барацьбе і ў войнах. Мы страцілі велізарную колькасць людзей, абараняючы нашу зямлю. Таму мы так трапятліва, і я ў тым ліку, стаўлюся да гэтых праблем», — заявіў беларускі кіраўнік.
«Галоўнае для нас — забяспечыць стабільнасць. Усё астатняе мы знойдзем. Галоўнае — мір і спакой. Як толькі мы скаланем нашу Беларусь, нам мала не падасца. Тут ужо далёка за вопытам хадзіць не трэба (не трэба ісці на Блізкі Усход, у Афрыку, ў Азію) — каля нашага парога яркі гэтаму прыклад», — падкрэсліў Лукашэнка.
Кіраўніка дзяржавы сустрэў мітрапаліт Мінскі і Заслаўскі Павел, патрыяршы экзарх усяе Беларусі. У саборы таксама прысутнічалі прыхаджане, прадстаўнікі праваслаўных брацтваў і сястрыцтваў, навучэнцы нядзельнай школы.
Лукашэнка запаліў свечку каля Мінскай іконы Божай Маці.
