Меркель прапануе Еўрасаюзу ўзмацніць санкцыі ў дачыненні да Расіі
Канцлер Германіі Ангела Меркель мае намер пераканаць краіны Еўрасаюза выступіць за ўзмацненне жорсткасці санкцый у дачыненні да Расіі з-за сітуацыі ў Сірыі. Пра гэта паведамляе нямецкая газета Frankfurter Allgemeine Sonntagszeitung са спасылкай на крыніцы з атачэння Меркель.
Санкцыі будуць абмяркоўвацца на саміце Еўрасаюза 20 ці 21 кастрычніка, адзначае газета. Крыніца газеты паведаміла, што Меркель будзе цяжка пераканаць сацыял-дэмакратаў — палітычных партнёраў Меркель у Германіі — і іншыя краіны ЕС у неабходнасці зрабіць санкцыі больш жорсткімі. Аднак «незадаволенасць Расіяй узрасла», адзначыла крыніца.
Прычынай для незадаволенасці паслужылі абвінавачванні ў датычнасці Расіі да нападаў на гуманітарны канвой у Сірыі і бамбёжках ў Алепа.
У размове з Меркель прэзідэнт ЗША Барак Абама паведаміў, што падтрымае «жорсткі адказ», калі Еўрасаюз пагодзіцца на гэта. Паводле дадзеных крыніцы газеты, калі санкцыі ў дачыненні да Расіі будуць больш жорсткімі, яны закрануць авіяцыйную сферу і расійскае міністэрства абароны.
19 верасня сірыйскія актывісты паведамілі пра авіяўдары, нанесеныя па гуманітарным канвоі і па офісе Чырвонага паўмесяца ў горадзе Орм аль-Кубра ў ваколіцах Алепа. Па іх словах, удар быў нанесены расійскай і сірыйскай авіяцыяй. Пацярпелі 18 грузавікоў з 31, і загінулі не менш за 20 чалавек.
Мінабароны Расіі заявіла аб недатычнасці расійскай авіяцыі да ўдару па гуманітарным канвоі ў Алепа. ЗША і сірыйскія апазіцыйныя групоўкі абвінавацілі ў атацы менавіта Расію.
Публікуецца ў межах спецыяльнай рубрыкі «Навіны Германіі»
