У маладзечанскім парку ездзіў вагончык з камуністычнай сімволікай, але пасля званка дырэктару «яе знесла ветрам»
У парку Перамогі ў Маладзечне ёсць такі атракцыён — адкрыты вагончык, на якім можна пракаціцца. У цёплае надвор’е забава досыць папулярная сярод бацькоў з маленькімі дзецьмі, для якіх гэта пэўная экзотыка.
На трактары «Беларус», які возіць гэты вагончык, замацаваныя некалькі чырвоных сцяжкоў, на якіх змешчаны георгіеўская стужка, серп і молат.
Як пракаментаваў дырэктар парку Аляксандр Фалей, змясціць гэтыя сцяжкі кіроўца вырашыў самастойна. Маўляў, іх прадавалі ў кнігарні напярэдадні 9 мая, з гэтай нагоды і прымацаваў. Праўда, пасля гэтага тры месяцы ўжо прайшло, але сцяжкі ўсё яшчэ віселі.
— Гэта ж не забароненая сімволіка, не свастыка, — тлумачыць Аляксандр Фалей. — З ёй нашы бацькі і дзяды вызвалялі Радзіму, яе можна ўбачыць на парадах 9 мая. Ды і я нарадзіўся ў СССР, якога цяпер не існуе. Хаця я не прыхільнік КПСС, былі памылкі. Ні ў якія палітычныя партыі не ўваходжу.
Як дадаў дырэктар парку, цяпер сцяжкоў няма. Па словах кіроўцы, іх знесла ветрам.
