У Брэсце ля абласной радзільні ўсталявалі святлодыёдны экран для віншаванняў мам
У Брэсце ля абласной радзільні ўсталявалі шырокафарматны святлодыёдны відэаэкран для віншаванняў мам.
Рэалізавала праект брэсцкая кампанія «Бэбі media», піша БелаПАН.
Як паведаміла дырэктар кампаніі Ганна Кравякова, экран памерам 3х5 метраў размешчаны насупраць палат радзільні. Пакуль ён працуе ў тэставым рэжыме. Дзякуючы такому экрану бацькі і сваякі атрымаюць яшчэ адну магчымасць выказаць свае пачуцці і павіншаваць блізкага чалавека з нараджэннем дзіця.
«Неабходна будзе звярнуцца да нас і выбраць шаблон відэароліка, на аснове якога спецыялісты зробяць віншаванне. Яно будзе транслявацца на экране ля радзільні кожныя пяць хвілін на працягу дня. Кошт такой паслугі — ад 30 рублёў», — сказала Кравякова.
Паводле яе слоў, такі экран ля радзільні — першы ў Беларусі.
