Татуіроўка з Мікі Маусам дапамагла выйсці на злодзея
Ілюстрацыйнае фота.
Супрацоўнікі аддзела крымінальнага вышуку Цэнтральнага РУУС Мінска затрымалі 21-гадовага мінчука, які падазраецца ў крадзяжы рэчаў у адным са сталічных паркаў.
Як паведаміла прэс-афіцэр Цэнтральнага РУУС Мінска Таццяна Абозная, у міліцыю звярнуліся дзве дзяўчыны і хлопец. Яны распавялі, што, адпачываючы ў парку, пазнаёміліся з трыма маладымі людзьмі, пасля чаго сышлі купацца, пакінуўшы свае рэчы на лаўцы пад наглядам новых знаёмых.
Вярнуўшыся, сябры не знайшлі ні новых знаёмых, ні сумкі адной з дзяўчат. Але дзяўчына запомніла яркую прымету аднаго хлопца з злачыннай кампаніі: на целе была татуіроўка — Мікі Маус.
Эксперты ўстанавілі асобу хлопца з татуіроўкай. Стала вядома, што крадзеж здзейсніў яго сябар.
У дачыненні да фігуранта ўзбуджаная крымінальная справа па ч.1 арт. 205 (крадзеж) КК Беларусі. Максымальнае пакаранне па артыкуле прадугледжвае пазбаўленне волі тэрмінам да трох гадоў.
У РУУС нагадалі, што лепш за ўсё адпачываць у кампаніі добра знаёмых людзей, давяраць толькі ім прыглядаць за сваімі рэчамі.