У Брэсце раварысткі зладзілі велапарад у этна-стылі
У Брэсце 31 ліпеня раварысткі зладзілі велапарад у этна-стылі. Гэта быў IV велапарад «на шпільках».
Па словах арганізатара мерапрыемства Ірыны Гібашовай, адрозненнем сёлетняга параду ад папярэдніх стаў дрэс-код: пераважная большасць удзельніц мела этнічныя элементы у аддзенні.
Гібашова:«Абцасы ў нас ніколі не былі абавязковай умовай, бо гэта ўсё ж такі пытанне бяспекі. Аднак кожны велапарад праходзіць пад нейкай тэмай. Тэма сёлетняга параду — этна-стыль. Тэму абралі, бо гэта яскравая магчымасць паказаць сябе, вылучыцца».
Сёлета ўпершыню велапарад «на шпільках» выйшаў за межы тратуараў. Арганізаваная калона праехалася па праезнай частцы ад ДК прафсаюзаў да парка імя 1 траўня.
Па падліках Еўрарадыё, у мерапрыемстве прынялі ўдзел больш за 100 чалавек.
