У Жлобіне дзве школьніцы жылі з дарослымі мужчынамі: адна хутка стане мамай
У жаночую кансультацыю жлобінскай бальніцы звярнулася 15-гадовая навучэнка адной з гарадскіх школ. Акушэр-гінеколаг вызначыў 17—18 тыдняў цяжарнасці. Да высвятлення прычын будучага мацярынства падключыліся следчыя.
Аказалася, што школьніца са снежня 2015 па студзень 2016 года неаднаразова ўступала ў палавую сувязь з 20-гадовым жыхаром Жлобіна. У дачыненні да маладога чалавека заведзена крымінальная справа.
Яшчэ адна справа распачата ў дачыненні да 22-гадовага жыхара райцэнтра, што, як высветліла следства, жыў сумесна з другой школьніцай на працягу чатырох месяцаў.
За спакушэнне непаўналетніх абвінавачаным пагражае да чатырох гадоў пазбаўлення волі.
***
Нагадаем, што ў вёсцы пад Светлагорскам не так даўно стала мамай 14-гадовая школьніца. Бацька дзіцяці — 27-гадовы мясцовы жыхар. Пра іх сувязь таксама стала вядома, калі дзяўчынка зацяжарыла і прыйшла на прыём да доктара.
Аднак нягледзячы на тое, што мужчына ад бацькоўства не адмовіўся і хацеў узаконіць свае адносіны з непаўналетняй сужыцелькай, замест ЗАГСа ён апынуўся спачатку ў СІЗА, а затым суд прысудзіў яго да трох гадоў калоніі.