У Маладзечне трохгадовая дзяўчынка ноччу адна гуляла па горадзе. Шукаюць бацькоў
Пра гэта «РГ» распавёў загадчык Маладзечанскай дзіцячай гарадской бальніцы Сяргей Рылаў.
Супрацоўнікі міліцыі даставілі дзяўчынку ў прыёмны пакой дзіцячай бальніцы 11 мая каля гадзіны ночы. На выгляд ёй каля трох гадоў.
Дзяўчынка ішла адна па вуліцы ў раёне Бухаўшчыны. Яна была лёгка апранутая.
— Нам сказалі толькі тое, што яе завуць Ангеліна. Ні прозвішча, ні імя па бацьку, ні дакладны ўзрост нам невядомы, – кажа Сяргей Канстанцінавіч. – Стан яе здавальняючы, абследаванні яшчэ працягваюцца. Яна спрабуе штосьці распавесці, сказаць нам імя бацькі, але пакуль што складана разабраць яе словы.
Колькі яна прабудзе ў бальніцы, пакуль што невядома. Гэта залежыць ад таго, як хутка знойдуцца бацькі.
Як распавёў намеснік начальніка Маладзечанскага РАУС па ідэалагічнай рабоце і кадравым забеспячэнні Уладзімір Васількоў, у міліцыю каля 00:20 патэлефанаваў мужчына, які выгульваў сабаку. Ён і заўважыў дзяўчынку.
Супрацоўнікі міліцыі выехалі на месца і хутка яе адшукалі.
Маці дзяўчынкі ўжо ўстанавілі, аднак пакуль што невядома яе месцазнаходжанне.