Чатыры школьнікі Раціцкай школы (з-пад Гродна) знаходзяцца ў рэанімацыі
Чацвёра з 35 вучняў Раціцкай школы (Гродзенскі раён), шпіталізаваных з прыкметамі атручвання невядомай этыялогіі, знаходзяцца ў рэанімацыі. Такая інфармацыя агучана ў эфіры тэлеканала АНТ.
Як паведамлялася, 35 вучняў школы шпіталізаваны з прыкметамі атручвання невядомай этыялогіі ў Гродзенскую абласную дзіцячую клінічную бальніцу. Сёння днём у дзяцей, якія займаліся на другім паверсе школы, адбылося рэзкае пагаршэнне здароўя (галавакружэнне, млоснасць, ваніты, павышэнне тэмпературы цела і артэрыяльнага ціску).
Праведзеныя замеры паветра на ўтрыманне шэрагу хімічных рэчываў паказалі, што небяспечнай канцэнтрацыі няма, радыяцыйны фон не перавышаны. Цэнтр гігіены, эпідэміялогіі і грамадскага здароўя таксама праводзіць замеры на наяўнасць шкодных рэчываў, вынікі якіх будуць вядомыя пазней. На месцы здарэння працуе следча-аператыўная група.
