Украіна сёння згадвае ахвяраў Галадамору
Ва Украіне сёння, 28 лістапада, адзначаюць Дзень памяці ахвяраў галадамораў, які накіраваны на ўшанаванне памяці пацярпелых ад Галадамору 1932—1933 гадоў, а таксама галадамораў 1921—1922 і 1946—1947 гадоў.
Дзень памяці ахвяраў галадамораў адзначаюць ва Украіне штогод у чацвёртую суботу лістапада. У 2015 годзе гэты дзень выпадае на 28-е.
У Кіеве сёння пройдуць жалобныя мерапрыемствы на тэрыторыі Нацыянальнага музея «Мемарыял памяці ахвяр Галадамору».
Згодна з указам прэзідэнта, 28 лістапада на тэрыторыі Украіны будзе прыспушчаны дзяржаўны сцяг і абмежавана правядзенне мерапрыемстваў забаўляльнага характару, а ў 16:00 (17:00 па Мінску) будзе абвешчана агульнанацыянальная хвіліна маўчання.
Акрамя таго, у 16:00 (17:00 па Мінску) украінцаў просяць запаліць свечкі памяці ў кожным доме і ва ўсіх органах дзяржаўнай улады.
Інстытут дэмаграфіі і сацыяльных даследаванняў імя Птухі НАН Украіны, які праводзіў даследаванні сумесна з амерыканскімі навукоўцамі, назваў колькасць ахвяраў Галадамору 30-х гадоў. На іх думку, з 1932 па 1934 ахвярамі голаду ва Украіне сталі 3,9 млн украінцаў, што складае 13% ад агульнай колькасці насельніцтва на той момант. Даследнікі настойваюць, што менавіта гэтая лічба з'яўляецца навукова абгрунтаванай і прызнанай міжнароднай навуковай супольнасцю.
